არემონტებული ხელოვნების სასახლე და აღმაშენებლის გამზირი, შესაძლოა, ერთ დღეს, 23 ნოემბერს გაიხსნას. ამასთან დაკავშირებით "ჯი-ეიჩ-ენს" კინოს, მუსიკისა და ქორეოგრაფიის სახელმწიფო მუზეუმში განუცხდეს.
"კინოს, მუსიკის და ქორეოგრაფიის სახელმწიფო მუზეუმის" გახსნა გამზირის სარემონტო სამუშაოს დასრულებას ელოდება. როგორც "ჯი-ეიჩ-ენს" მუზეუმის დირექტორმა გიორგი კალანდიამ განუცხადა, მოლაპრაკება მიმდინარეობს და შესაძლებელია განახლებული მუზეუმი და გამზირი ერთ დღეს გაიხსნას.
"მიმდინარეობს მოლაპარაკებები. გვინდა, 23 ნოემბერს გავხსნათ მუზეუმი. არქიტექტორებს და ამ საქმეში ჩართულ ადამიანებს უნდა დაველაპარაკო და დავადგინო ზუსტი თარიღი", - აღნიშნა "ჯი-ეიჩ-ენთან" საუბარში კალანდიამ.
მუზეუმის ფონდებში ინახება ძველი და თანამედროვე ქართული თეატრის, კინოს, მუსიკის და ქორეოგრაფიის ისტორიის ამსახველი უმდიდრესი მასალა (დაწყებული ვანში აღმოჩენილი ანტიკური პერიოდის თეატრალური ნიღბით და დამთავრებული XX ს-ის ავანგარდული ხელოვნების ნიმუშებით). მათ შორისაა: XVII ს-ის ფერწერის ნიმუშები, სპარსული მინიატიურები, გერმანული და ფრანგული გრავიურები, ელ. ახვლედიანის, ირ. გამრეკელის, ი. ნიკოლაძის, ლ. გუდიაშვილის, ს. ვირსალაძის, პ. ოცხელის, დ. კაკაბაძის, ვ. სიდამონ-ერისთავის, ს. ქობულაძის, ლ. ბაქსტის, ალ. ბენუას. კ. ზდანევიჩის, ფ. ლეჟეს, აგრეთვე თანამედროვე ხელოვანთა (გ. ალექსი-მესხიშვილის, ი. გეგეშიძის. ნ. მალაზონიას, მ. ჭავჭავაძის, ირ. ფარჯიანის, ს. ფარაჯანოვის ნამუშევრები), ლიტერატურისა და ხელოვნების ცნობილი მოღვაწეების - ილია ჭავჭავაძის, გ. ერისთავის, აკ. წერეთლის, ნემიროვიჩ-დანჩენკოს, სუმბათაშვილ-იუჟინის, ი. შტრაუსის, დ. შალიაპინის, სტანისლავსკის, კ. მარჯანიშვილის, შ. დადიანის, ს. ახმეტელის, დ. არაყიშვილის და სხვა შემოქმედთა პირადი წერილები, ხელნაწერები, არქივები. ფონდებში დაცულია აგრეთვე თეატრალური კოსტიუმები, მემორიალური ნივთები, აუდიო- და ვიდეოჩანაწერები, აფიშები, პროგრამები, კინოფირები, თეატრალურ-დეკორატიული ხელოვნების კოლექციები და სხვა საინტერესო მასალა.
