საზოგადოებრივი ჯანდაცვის რაიონული ცენტრის ეპიდემიოლოგების განცხადებით, კახეთში ბრუცელოზით ადამიანის დაავადების შემთხვევებმა იმატა. ოფიციალური სტატისტიკური მონაცემებით, 2011 წლის 10 თვეში რეგიონში ბრუცელოზით ადამიანის დაავადების 77 შემთხვევა გამოვლინდა.
კახეთის საინფორმაციო ცენტრის ინფორმაციით, ბრუცელოზით ყველაზე მეტი ადამიანი ახმეტის და საგარეჯოს რაიონებში ავადდება. ახმეტის რაიონში 2008 წელს ბრუცელოზის 26 შემთხვევა გამოვლინდა; 2009 წელს - 15; 2010 წელს - 17; 2011 წელს - 20; საგარეჯოში 2008 წელს ბრუცელოზის 38 შემთხვევაა რეგისტრირებული; 2009 წელს - 31; 2010 წელს - 27; 2011 წელს - 20.
ეპიდემიოლოგების თქმით, კახეთში ბრუცელოზით ადამიანის დაავადების გაცილებით მეტი შემთხვევაა, თუმცა მონაცემები რეგისტრირებული არ არის. ამის მიზეზად საზოგადოებრივი ჯანდაცვის რაიონულ ცენტრებში იმას ასახელებენ, რომ ზოგიერთ შემთხვევაში სამედიცინო დაწესებულებები საზოგადოებრივი ჯანდაცვის სამსახურს მონაცემებს არ აწვდიან, ბევრ შემთხვევაში კი დაავადებულები ექიმის მეთვალყურეობით სახლში მკურნალობენ ან თვითმკურნალობას მიმართავენ.
საზოგადოებრივი ჯანდაცვის კახეთის რეგიონული სამსახურის ხელმძღვანელის ნუნუ ნოზაძის თქმით, ბრუცელოზით ადამიანის დაავადებას აუდუღარი რძის პროდუქტების მიღება იწვევს, განსაკუთრებით საშიში კი ყველია.
ბრუცელოზი ადამიანისა და ცხოველის ინფექციურ - ალერგიული დაავადებაა, რომელიც ხანგრძლივად მიმდინარეობს და ძირითადად ნერვულ სისტემას, ძვლებს და სახსრებს აზიანებს. ბრუცელოზის გამომწვევი მიკროორგანიზმები - ბრუცელები სამი სახისაა: ცხვრის, ხარის და ღორის. ინფექციის ძირითადი წყაროა დაავადებული ცხოველი. ადამიანები ბრუცელოზით ავადდებიან საქონლის რძის დალევის, რძის ნაწარმის, ცუდად მოხარშული ან შემწვარი ხორცის ჭამის შედეგად. ორგანიზმში ბრუცელები შეიძლება მოხვდნენ აგრეთვე დაზიანებული ლორწოვანი გარსიდან ან კანიდან, სასუნთქი გზებიდან და ა.შ.
ადამინიდან ადამიანს ბრუცელოზი არ გადაეცემა, ამიტომ ავადმყოფის მოვლა სრულიად უსაფრთხოა. ინკუბაციური პერიოდი 10-15 დღე გრძელდება, შემდეგ ჩნდება დაავადების ნიშნები: ტემპერატურის მომატება, კუნთების ტკივილი, სახსრების ტკივილი და ანთება, ძლიერი ოფლიანობა, ზოგადი სისუსტე. ეს ნიშნები თანდათანობით ძლიერდება, 1 - 4 კვირის შემდეგ სუსტდება და ისპობა, მყარდება მშვიდი პერიოდი (რემისია). 1-4 კვირის შემდეგ დაავადება ისევ მწვავდება, მაგრამ ნაკლები ინტენსიობით. ასე მიმდინარეობს ბრუცელოზი რამდენიმე თვიდან 3 წლამდე, თუ ავადმყოფს არ დაესვა დიაგნოზი და არ დაეწყო მკურნალობა.
ბრუცელოზი ადამიანებში სიკვდილიანობას არ იძლევა. ადამიანის ბრუცელოზის პროფილაქტიკის რადიკალური საშუალებაა ცხოველებში ამ დაავადების აღმოფხვრა.
