საქართველოს მთავრობის მიზანია, შექმნას ეფექტიანი და დამისამართებული საპენსიო და სოციალური დახმარებების სისტემა, რომელიც უზრუნველყოფს ხანდაზმული მოქალაქეებისთვის ღირსეულ სიბერეს. ამის შესახებ მთავრობის ათ პუნქტიანი გეგმაშია ნათქვამი.
გეგმის თანახმად, საპენსიო სისტემა და სოციალური დახმარებების სისტემა ფინანსურად მდგრადი უნდა იყოს, რაც ნიშნავს, რომ ფინანსური ტვირთი ბიუჯეტზე უნდა იყოს თანაზომადი ეკონომიკური ზრდისა, საგადასახადო ტვირთის და დემოგრაფიული ცვლილებებისა.
2011 წლის 1 სექტემბრიდან ასაკით და მკვეთრად გამოხატული შეზღუდული შესაძლებლობის მქონე პენსიონერებისათვის მინიმალური პენსია გაიზარდა 100 ლარამდე და შენარჩუნდა ყველა არსებული შეღავათი.
მთავრობის ინფორმაციით, პენსიის ზრდის შემდეგი ეტაპები ითვალისწინებს საპენსიო პაკეტის 100 დოლარამდე გაზრდას, რომელიც გააერთიანებს არსებულ შემწეობებსა და პენსიებს, მასში ასევე შევა სადაზღვევო ვაუჩერი. მიზანია, ყველა 60 წელს გადაცილებულ მოქალაქეს საშუალება ჰქონდეს, დაეზღვიოს ისეთი სადაზღვევო პაკეტით, რომელიც მოიცავს არა მარტო ამბულატორიულ მომსახურებას, არამედ მედიკამენტების შეძენის თანადაფინანსებასაც.
"გაგრძელდება საჭიროებაზე დაფუძნებული მიზნობრივი სოციალური პოლიტიკა, დაიხვეწება ოჯახების შეფასების მეთოდოლოგია, რათა გაიზარდოს როგორც მიზნობრიობის სიზუსტე, ისე დახმარების ეფექტიანობა. მიზნობრივი სოციალური დახმარება უნდა იყოს ორიენტირებული სიღარიბის დაძლევაზე და არ შექმნას აქტიურ ეკონომიკურ საქმიანობაში ჩაურთველობის სტიმულები, მათთვის, ვისაც ამის შესაძლებლობა აქვს", - აღნიშნულია გეგმაში.
