"ახალგაზრდა ფინანსისტთა და ბიზნესმენთა ასოციაციამ" დღეს გამართულ ბრიფინგზე ბიუჯეტის ახალი პროექტის განხილვის შედეგად აღმოჩენილი ხარვეზებზე ისაუბრეს. "აფბა" პარლამენტს ბიუჯეტის განხილვისას მათი გათვალისწინებისკენ მოუწოდებს.
"ბიუჯეტის ახალ პროექტში სამოქმედო გეგმა და პრიორიტეტები, წინა წელთან შედარებით, ფაქტობრივად, უცვლელია. ეს იმიტომ, რომ პრიორიტეტების ქვეშ ჩამოთვლილია ფუნქციები, რომელთა განხორციელებაც სახელმწიფოს ჩვეულებრივ, კანონმდებლობით განსაზღვრულ საქმიანობას წარმოადგენს და ის ღონისძიებები, რომელთა განხორციელებაც ხარვეზების აღმოსაფხვრელად არის საჭირო, განხილული არ არის. მიუხედავად იმისა, რომ მიზნები მითითებულია, ისინი იმდენად ზოგადია, რომ მათი შესრულებისთვის საჭირო ხარჯების ეკონომიკურად დასაბუთება და კონკრეტულ ინდიკატორებში გამოხატვა შეუძლებელია. არაპროგრამულობის და დაგეგმვის დაბალ ხარისხს მიუთითებს ბიუჯეტის კანონპროექტის მუხლი - "სხვა ხარჯები". მართალია მიმდინარე წელთან შედარებით 2012 წელს ამ კატეგორიაში შემავალი ხარჯების აბსოლუტური მაჩვენებელი შემცირებულია, თუმცა უმნიშვნელოდ. თუ 2011 წელს სხვა ხარჯებისთვის გამოყოფილი იყო 887 004.1 მილიონი ლარი, მომავალ წელს ეს მაჩვენებელი 836 482.4 მილიონი ლარი იქნება, რაც მთლიანი ხარჯების 12,8%-ია", - განაცხადა "აფბას" პრეზიდენტმა ნოდარ ჭიჭინაძემ.
მისი თქმით, 2012 წლის ბიუჯეტის პროექტით შემოსავლების ზრდა 4.7%-ით არის გათვალისწინებული და აბსოლუტურ მაჩვენებელში 6 606 025.8 მილიონ ლარს შეადგენს. ჭიჭინაძის ინფორმაციით, ამ მაჩვენებლის დიდი ნაწილი საგადასახადო შემოსავლებზე მოდის, რომელიც 2012 წელს 450 მილიონი ლარით იზრდება.
"მართალია, ბიუჯეტის შემოსავლები იზრდება, მაგრამ 2012 წელს ბიუჯეტის მთლიანი შემოსულობები მცირდება. აქ იგულისხმება, რომ ყველა ის შემოსავალი, რომელსაც სახელმწიფო სხვადასხვა წყაროდან იღებს, მცირდება. 2011 წელს ბიუჯეტის მთლიანი შემოსულობები განსაზღვრული იყო 8 360 962.3 მილიონი ლარით, 2012 წელს კი ეს მაჩვენებელი 7 673 700.0 მილიონი ლარი იქნება, ანუ შემოსულობების მოცულობა 687 262.3 მილიონი ლარით მცირდება. ეს იმას ნიშნავს, რომ ყველა იმ გადასახდელისთვის, რომელიც სახელმწიფომ უნდა გადაიხადოს 2012 წელს, თითქმის 700 მილიონი ლარით ნაკლები იქნება გამოყოფილი", - განაცხადა ჭიჭინაძემ.
ჭიჭინაძემ ისაუბრა სახელმწიფო სექტორში დასაქმებულთა საშუალო ხელფასის მაჩვენებელზედაც.
"2012 წლის საბიუჯეტო კანონის მიხედვით. მიმდინარე წელთან შედარებით 2012 წელს საბიუჯეტო ორგანიზაციებში დასაქმებულთა რიცხვი 100 130 კაციდან 99 538 კაცამდე მცირდება. ამის ფონზე შრომის ანაზღაურებისთვის გამოყოფილი თანხის მოცულობა 47 მილიონ 930 ათასი ლარით იზრდება და 1 080 143.0 მილიონი ლარის ნაცვლად, მომავალ წელს იგი 1 128 073.0 მილიონი ლარი იქნება. მოცემულ რიცხვებზე დაყრდნობით შეგვიძლია გამოვთვალოთ სახელმწიფო სექტორში დასაქმებულთა საშუალო ხელფასის მაჩვენებელი. 2011 წელს ეს მაჩვენებელი შეადგენდა 10 787 ლარს, 2012 წელს კი ეს ციფრი 11 333 ლარი იქნება", - განაცხადა ჭიჭინაძე.
ჭიჭინაძის თქმით, საინტერესოა ის ფაქტიც, რომ საგადასახადო შემოსავლების უდიდეს ნაწილს (დაახლოებით 85%-ს) უზრუნველყოფენ ფიზიკური პირები, ანუ ბიუჯეტის, ფაქტობრივად, თითოეული მოქალაქე ავსებს საკუთარი ჯიბიდან და კორპორაციები და იურიდიული პირები ბიუჯეტის საშემოსავლო ნაწილის დაახლოებით 15%-ს უზრუნველყოფენ.
