„ქრისტიან-დემოკრატებს" „როზნერის" კვლევების თანახმად 13% აქვთ. გიორგი თარგამაძის განცხადებით, „ქრისტიან-დემოკრატების" მიმართ საზოგადოების მნიშვნელოვანი ნაწილის კეთილგანწყობა და სტაბილურად მზარდი რეიტინგი უპირველეს ყოვლისა დამოკიდებულია თავად საზოგადოებრივ განწყობაზე და იმაზე, რომ წლების განმავლოაბში უპირველესად საქართველოს ხელისუფლება და სამწუხაროდ ოპოზიციის ნაწილი, ცდილობს ქართული პოლიტიკური სპექტრის დახარისხებას შავად და თეთრად. თუმცა მოძრაობის ლიდერი მოხარულია, რომ საზოგადოებაში არის მოსახლეობის მნიშვნელოვანი ნაწილი, რომელსაც შეუძლია არჩევანის გაკეთება და სხვა ფერების გარჩევაც, მაგალითისთვის „ქრისტიან-დემოკრატების" დროშის და სიმბოლიკის, ქართული შინდისფერის.
„ქრისტიან-დემოკრატიული მოძრაობის მთავარი საფირმო ნიშანი ეს არის ზომიერება და სამართლიანობა და სწორედ ამ ე.წ. ზომიერთა ფლანგზე, ჩვენ სტაბილურად ვინარჩუნებთ ლიდერის პოზოციებს, რამდენადაც ერთი უკიდურესობიდან არ ვაწყდებით მეორე უკიდურესობას, არ ვცვლით მიდგომებს და დანაპირებს ჩვენი მხარდამჭერებისადმი, მაშინ როდესაც მთელ რიგ პოლიტიკურ ძალებსა და მათ ლიდერებს ხშირად გამოუვლენიათ და ახლაც ავლენენ სრულ არათანმიმდევრულობას არჩეული ზომიერი სტრატეგიის მიმართ. ჩვენ მიგვაჩნია, რომ ეს ორი მთავარი კომპონენტი განაპირობებს ქრისტიან-დემოკრატიული მოძრაობის მხარდამჭერთა რაოდენობის ზრდას და გამყარებას", - განაცხადა გიორგი თარგამაძემ.