საქართველოში ქართული ექსპორტის სააგენტო იქმნება. ამ სააგენტოს შექმნა კანონით დარეგულირდება. პარლამენტში უკვე შესულია ახალი კანონპროექტი, რომელიც სააგენტოს შექმნის პრინციპებს განსაზღვრავს. კანონპროექტის მიზანია ექსპორტის ხელშეწყობის განმახორციელებელი ორგანოს, ქართული ექსპორტის სააგენტოს შექმნა, მისი ფუნქციონირების, მართვის სამართლებრივი, ორგანიზაციული საფუძვლების და დაფინანსების პრინციპების განსაზღვრა.
სააგენტოს საქართველოს მთავრობის თანხმობით უფლება აქვს:
შეიძინოს, გაასხვისოს ან დატვირთოს თავის მფლობელობაში არსებული უძრავი და მოძრავი ქონება, აიღოს სესხი; განსაზღვროს სააგენტოს საშტატო განრიგი და სახელფასო ფონდი.
სააგენტოს დირექტორს თანამდებობაზე ნიშნავს და თანამდებობიდან ათავისუფლებს საქართველოს მთავრობა.
სააგენტოს საქმიანობის სახელმწიფო კონტროლს მთავრობა ახორციელებს.
ახალი კანონპროექტის ინიციატორი პარლამენტის წევრი ემზარ გელაშვილია.
