ნავთობპროდუქტების მწარმოებელთა, იმპორტიორთა და მომხმარებელთა კავშირის თავმჯდომარე ვანო მთვრალაშვილის განცხადებით, ოქტომბრის თვეში ნავთობის ფასი მსოფლიოს წამყვან სანავთობო ბირჟებზე ძირითადად იზრდება. კერძოდ, თვის დასაწყისიდან 17 ოქტომბრის მდგომარეობით ლონდონში InterContinental Exchange Futures Europe-ზე Brent ტიპის ნავთობის ფასი გაიზარდა 101.71 დოლარიდან 110.16 დოლარამდე/ბარელზე, ხოლო ნიუ-იორკში New York Mercantile Exchange-ზე (NYMEX) - Light Sweet ტიპის ნავთობის ფასი - 77.61 დოლარიდან 86.38 დოლარამდე/ბარელზე.
"რამდენიმე დღის წინ გაიმართა G-20 ქვეყნების სამიტი, რომელიც მიეძღვნა ევრო ზონაში არსებულ ფინანსურ კრიზისს. სამიტის მონაწილეებმა მხარი დაუჭირეს ,,ევროპის ფინანსური სტაბილურობის ფონდის" მიერ ახალი გადამჭრელი ზომების მიღებას კრიზისის გაღრმავების თავიდან აცილების მიზნით. ეს პოზიტიურ სიგნალად იქნა მიჩნეული მსოფლიო სანავთობო სფეროს ინვესტორების მიერ, რომლებიც ამას აღიქვამენ, რომ ახალი კრიზისის ნაცვლად ადგილი ექნება მსოფლიო ეკონომიკური ზრდის დონის შემცირებას. ყოველი ეს ფაქტორი მოქმედებს ნავთობის მსოფლიო მოთხოვნილებაზე და შესაბამისად, პირდაპირ გავლენას ახდენს ნავთობის ფასზე. ზემოჩამოთვლილი ფაქტორების გამო წამყვანი საერთაშორისო ექსპერტები გრძელვადიან პერსპექტივაში ნავთობის ფასის პროგნოზირებას ვერ ახდენენ, ვინაიდან ნავთობის ფასის მატებას შესაძლოა მოჰყვეს ფასის მკვეთრი ვარდნა ან პირიქით"- განმარტავს მთვრალაშვილი.
მთვარალაშვილი აცხადებს, რომ საცალო ქსელში ფასის კორექტირება ბოლოს 3 ოქტომბერს მოხდა და საწვავის ფასი 5-5 თეთრით გაიაფდა.
დღეისათვის ჩვენი ქვეყნის საცალო ქსელში საწვავის საშუალო ფასი შეადგენს:
სუპერი ტიპის ბენზინი - 2.25 - 2.30 ლარი/ლიტრაზე; პრემიუმი ტიპის ბენზინი - 2.18 - 2.25 ლარი/ლიტრაზე; ევრო რეგულარი ტიპის ბენზინი - 2.05 - 2.10 ლარი/ლიტრაზე; რეგულარი ტიპის ბენზინი - 2.05 ლარი/ლიტრაზე;
ევრო დიზელი - 2.30 ლარი/ლიტრაზე; დიზელი (ლ-62) - 2.10 - 2.15 ლარი/ლიტრაზე.