უკრაინაში ქართული ხურმის ექსპორტი დაიწყო. როგორც სააგენტო "ჯი-ეიჩ-ენს" აჭარის სოფლის მეურნეობის სამინისტროში განუცხადეს, უკრაინის მიმართულებით უკვე გადაზიდულია 871 ტონა ხურმა.
სამინისტროში განმარტავენ, რომ ხურმის ექსპორტით 15-მდე კომპანიაა დაკავებული და ადგილზე 1 კგ. ხურმის შესასყიდი ფასი 50-60 თეთრია.
სეზონის განმავლობაში ექსპორტზე 5 ათასი ტონა ხურმის ექსპორტია დაგეგმილი, საიდანაც 2 ათასი ტონა, აჭარაში მოწეული ხურმა იქნება. აჭარის სოფლის მეურნეობის სამინისტროში ამბობენ, რომ ქართულ ხურმაზე უკრაინაში დიდი მოთხოვნაა, რადგანაც საქართველოში მოწეული ხურმა მაღალი ხარისხითა და გემოვნური თვისებებით გამოირჩევა. უახლოეს ხანებში ქართული ხურმის ექსპორტი ბელორუსის მიმართულებითაც დაიწყება.
სამინისტროში აცხადებენ, რომ მზარდი მოთხოვნის ფონზე, აჭარაში ხურმის პლანტაციების გაშენებაც და საწარმოს მშენებლობაც იგეგმება. ამ მიზნით აჭარის მთავრობა თურქ ინვესტორებთან მოლაპარაკებებს უახლოეს პერიოდში დაასრულებს და რეგიონში საწარმოს მშენებლობა დაიწყება, სადაც ხურმის გამოშრობა და ჩირის წარმოება და შემდგომ მისი რეალიზაცია მოხდება.
შეგახსენებთ, რომ 2010 წელს ქართული ხურმა უკრაინისა და ბელორუსის გარდა სომხეთში, უზბეკეთსა და მოლდოვაში გადაიზიდა.