საქართველოსა და კორეის კომპანიებს შორის თანამშრომლობა ღრმავდება. საქართველოს რეგიონული განვითარებისა და ინფრასტრუქტურის მინისტრი რამაზ ნიკოლაიშვილი საქართველოში ოფიციალური ვიზიტით მყოფ კორეის საერთაშორისო კონტრაქტორების ასოციაციის (ICAK) დელეგაციას და მსხვილი კორეული კომპანიების (Daewoo International, DMEC, DOWHA, Dongsun, Heerym) ხელმძღვანელ პირებს შეხვდა.
შეხვედრის მიზანი კორეასა და საქართველოს შორის ბიზნეს ურთიერთობების გაღრმავება და საქართველოს რეგიონებში არსებული ბიზნეს გარემოს პოტენციური ინვესტორებისთვის გაცნობა იყო.
მინისტრმა კორეელ ბიზნესმენებს მიაწოდა ინფორმაცია რეგიონებში განხორციელებულ და მიმდინარე მსხვილი ინფრასტრუქტურული პროექტებისა და სამომავლოდ დაგეგმილი ტენდერების შესახებ. კორეული დელეგაციის წევრები საქართველოს რეგიონული განვითარების სახელმწიფო სტრატეგიითაც დაინტერესდნენ.