რუსეთი ქართველი დიპლომატებისთვის შეუფერხებელი მუშაობის უზრუნველსაყოფად ნაკისრ ვალდებულებებს არ ასრულებს. ამის შესახებ დღეს გამართულ ტრადიციულ ბრიფინგზ საქართველოს საგარეო საქმეთა მინისტრის პირველმა მოადგილემ ნიკოლოზ ვაშაკიძემ განაცხადა.
„საკონსულოს შენობასთან დაკავშირებით რუსული მხრიდან შეიქმნა დაბრკოლებები და დაუსაბუთებელი მოთხოვნები. რა თქმა უნდა ეს პროცესი დასრულებული არ არის. დანიშნულია სასამართლო, რომელიც ნოემბერში უნდა გაიმართოს. ჩვენ გამოვდივართ მარტივი პრინციპიდან, რომ რუსეთს აქვს ნაკისრი ვალდებულებები, რომ უზრუნველყოს სრული და შეუფერხებელი მუშაობა საქართველოს დიპლომატებისთვის, რომლებიც აკრედიტებულები არიან მოსკოვში. რუსეთი ამას სამწუხაროდ არ ასრულებს. ვფირობთ დაველოდოთ მათ საბოლოო ნაბიჯებს. აქ პრაქტიკულად მათ არაგამართლებულ ქმედებებთან გვაქვს საქმე.", - განაცხადა ვაშაკიძემ.
2011 წლის 17 აგვისტოს 10:40 საათზე ოსტოჟენკოს ქუჩა N 26/1-ში მდებარე შენობაში განთავსებულ საქართველოს ინტერესების სექციას მეორედ შეუწყდა ელექტროენერგიის მიწოდება, რის გამოც სექცია იძულებული გახდა შეეჩერებინა მოქალაქეთა საკონსულო მომსახურება.
მოსკოვის საარბიტრაჟო სასამართლომ 18 აგვისტოს სააქციო საზოგადოება "ოსტოჟენკის ბიზნესცენტრის" საარჩელი დაარეგისტრირა, რომლითაც მისი კუთვნილი შენობიდან საქართველოს ინტერესების სექციის გამოსახლებას ითხოვს. ასევე, მოსარჩელე ქართველი დიპლომატებისგან დაგროვილი დავალიანების გადახდას მოითხოვს.
