ქალაქ ბუქარესტში, ნატოს საპარლამენტო ასამბლეის პლენარული სესიის ფარგლებში 8 ოქტომბერს, გაიმართა საქართველოს დელეგაციის შეხვედრა აშშ საპარლამენტო დელეგაციასთან. აშშ-ს მხრიდან შეხვედრაში მონაწილეობდნენ დელეგაციის ხელმძღვანელი მაიკლ ტერნერი (რესპუბლიკელი, ოჰაიო), ჯეფ მილერი (რესპუბლიკელი, ფლორიდა), ჯო ენ ემერსონი (რესპუბლიკელი, მონტანა), ბობი სკოტი (დემოკრატი, ჯორჯია), კაროლინ მაკკარტი (დემოკრატი, ნიუ იორკი), მაიკ როსი (დემოკრატი, არკანზასი).
საქართველოს დელეგაციის ხელმძღვანელმა გიორგი კანდელაკმა მიმოიხილა უსაფრთხოების კუთხით ქვეყნის წინაშე არსებული გამოწვევები, საქართველოს წვლილი ავღანეთში მიმდინარე ნატო-ს სამშვიდობო ოპერაციაში და საქართველოს ნატო-ში გაწევრიანების პროცესის მდგომარეობა მომავალ წელს ქ. ჩიკაგოში დაგეგმილ ალიანსის სამიტის კონტექსტში.
ამერიკელმა კონგრესმენებმა ქართველ კოლეგებს მადლობა გადაუხადეს საქართველოს მიერ ავღანეთში მიმდინარე ოპერაციაში შეტანილი მასშტაბური წვლილის გამო. მათ ასევე ისაუბრეს ჩიკაგოს სამიტის კონტექსტში საქართველოსთვის აშშ-ს კონგრესის მხრიდან მხარდაჭერის გზებზე.
შეხვედრის შემდეგ, ამერიკულმა დელეგაციამ, რომელშიც შედიან როგორც რესპუბლიკელი, ასევე დემოკრატი კონგრესმენები, წერილობითი განცხადება გაავრცელა. განცხადებაში აღნიშნულია რომ ნატოს ყოველწლიური სამოქმედო პროგრამის ფარგლებში და ზოგადად რეფორმების კონტექსტში მიღწეული პროგრესის გამო, აუცილებელია საქართველოს ალიანსში გაწევრიანების პროცესის შეუქცევადობის დადასტურება და საქართველოსთვის ჩიკაგოს სამიტზე გაწევრიანების სამოქმედო გეგმის შეთავაზება.
განცხადებაში ასევე ნათქვამია, რომ აშშ კონგერსში განიხილავს რეზოლუციას, რომელიც მხარს უჭერს საქართველოსთან თავისუფალი ვაჭრობის ხელშეკრულების შესახებ მოლაპარაკებების დაწყებას. აშშ-ს დელეგაციამ ასევე მიესალმა საქართველოსთვის მცირე ხნის წინ თავდაცვის სფეროში თანამშრომლობის კუთხით წინ გადადგმულ ნაბიჯებს. „ძლიერი საქართველო უდაოდ შედის ნატოსა და მისი წევრების ინტერესებში," აღნიშნულია განცხადებაში.