ხვალ, 10 ოქტომბერს, 09:45 საათზე, ქ. ბათუმში, სასტუმრო “შერატონ ბათუმში”, ეკონომიკისა და მდგრადი განვითარების სამინისტროს, საერთაშორისო საავტომობილო კავშირის და ”სუამის“ ორგანიზებით, სამოდელო გზატკეცილის ინიციატივასთან (MHI) დაკავშირებით გაიმართება ექსპერტთა ჯგუფის შეხვედრა.
შეხვედრაში მონაწილეობას მიიღებენ საქართველოს ეკონომიკისა და მდგრადი განვითარების მინისტრის მოადგილე გიორგი კარბელაშვილი და ამავე სამინისტროს ტრანსპორტის პოლიტიკის დეპარტამენტის უფროსი ია ჯანაშია. შეხვედრაში წარმომადგენლები იქნებიან აგრეთვე საქართველოს ფინანსთა და რეგიონული განვითარებისა და ინფრასტრუქტურის სამინისტროების, აზერბაიჯანის და თურქეთის შესაბამისი სატრანსპორტო უწყებებიდან. აგრეთვე შეხვედრას დაესწრებიან მსოფლიო ბანკის, აზიის განვითარების ბანკის, ევროპის რეკონსტრუქციისა და განვითარების ბანკის და ბიზნეს სექტორის წარმომადგენლები.
შეხვედრის ძირითადი განსახილველი თემაა - ბაქო–თბილისი–ბათუმი/ტრაბზონის ავტომაგისტრალის პერსპექტივები, გამოწვევები და დამხმარე ინფრასტუქტურის განვითარება. დამხმარე ინფრასტუქტურა გულისხმობს საბაჟო გამშვები პუნქტების მოდერნიზებას და აღჭურვას თანამედროვე ტექნოლოგიებით, ბენზინ გასამართი სადგურების, ავტოსადგომების და სასტუმროების ქსელის გაფართოება.
ყოველივე ზემო აღნიშნული ხელს შეუწყობს ევროპა-კავკასია-აზიის რეგიონში საავტომობილო სატვირთო გადაზიდვების ზრდას და დამატებითი სამუშაო ადგილების შექმნას. შეხვედრაზე ასევე განიხილავენ კერძო სექტორის როლს დამხმარე საგზაო ინფრასტუქტურის განვითარებაში და ინვესტიციების მოზიდვის პერსპექტივებს.
მასალის გამოყენების პირობები
