ლაგოდეხის საავადმყოფოს ერთი თვეა წყალი არ მიეწოდება, რის გამოც როგორც საავადმყოფოს ექიმებმა კახეთის საინფორმაციო ცენტრს განუცხადეს, ოპერაციებს ვერ აკეთებენ. რაიონის გამგებელი აცხადებს, რომ მას ინფორმაცია არ აქვს.
21 აგვისტოს, ძლიერი წვიმის შედეგად ადიდებულმა მდინარე შრომის ხევმა სასმელი წყლის სათავე ნაგებობა დააზიანა, რომელიც ამ დრომდე არ შეუკეთებიათ. წყალმა წაიღო საავადმყოფომდე მისასვლელი მთავარი გზაც. ავადმყოფები და ექიმები შემოვლითი გზით სარგებლობენ.
„უწყლობის გამო ოპერაციებს ვერ ვატარებთ, რადგან სამედიცინო იარაღებს დამუშავება სჭირდება. სასმელ წყალს საავადმყოფოსთან ახლოს მცხოვრები ოჯახებიდან ვეზიდებით. სტიქიის შემდეგ საავადმყოფოში შემოვლითი გზით დავდივართ და ყურადღებას არავინ გვაქცევს", - განუცხადეს კახეთის საინფრმაციო ცენტრს საავადმყოფოს თანამშრომლებმა.
ლაგოდეხის მუნიციპალიტეტის გამგებლის დიმიტრი ლოლაძის თქმით, საავადმყოფოს გზის რეაბილიტაციისთვის ხარჯთაღრიცხვას ახლა ადგენენ. „ლაგოდეხში წყლის სისტემის სარეაბილიტაციო სამუშაოებს კი საქართველოს გაერთიანებული წყალმომარაგების კომპანია აწარმოებდა. ჩემი ინფორმაციით კომპანიამ ლაგოდეხში წყალმომარაგება მთლიანად აღადგინა", - აღნიშნა დიმიტრი ლოლაძემ.
საქართველოს გაერთიანებული წყალმომარაგების კომპანიის კახეთის ფილიალის მენეჯერის ფარნა მაყაშვილის თქმით, საავადმყოფოს წყალი მხოლოდ პირველ სართულზე მიეწოდება. „რეანიმაციას მიეწოდება. ყველა სართულზე რომ აღდგეს წყალმომარაგება, ამისათვის ვმუშაობთ. სტიქიიამ სათავე ნაგებობაზე დიდი რაოდენობით ქვა - ღორღი მიიტანა და გაწმენდა სჭირდება", - განაცხადა მაყაშვილმა.
კახეთის საინფორმაციო ცენტრი დაზუსტებისათვის კიდევ დაუკავშირდა ლაგოდეხის საავადმყოფოს, სადაც აღნიშნეს, რომ წყალი არც პირველ სართულზე არ მოდის და ექიმები ავადმყოფებს სრულყოფილ სამედიცინო მომსახურებას ვერ უწევენ.
