საქართველოს პრეზიდენტის განკარგულებით, პირდაპირი მიყიდვის ფორმით 9 მილიონი აშშ დოლარის ეკვივალენტით ლარში გადაეცა შპს "სითი ლოფტს" სახელმწიფო საკუთრებაში არსებული უძრავი ქონება, თბილისში, კოსტავას ქუჩის N14 მდებარე ყოფილი გამომცემლობა "სამშობლოს" შენობა.
შპს "სითი ლოფტს" საპრივატიზებო პირობებად განესაზღვრა საპრივატიზებო თანხის გადახდა 2011 წლის პირველ დეკემბრამდე. აგრეთვე სამშენებლო-სარეკონსტრუქციო სამუშაოების ჩატარება და ამ მიზნით 10 მილიონი აშშ დოლარის ეკვივალენტის ლარში ინვესტიციის განხორციელება.
კომპანია „სითი ლოფტი"2011 წლის 8 სექტემბერს დაფუძნდა. კომპანიის იურიდიული მისამართია თბილისი, 26 მაისი სახელობის მოედანი.
კომპანიის დირექტორია ევგენი დავითაია, ხოლო კომპანიის 100 %-იანი წილი გიორგი ჩხეტიას ეკუთვნის. კომპანია დაფუძნების დღესვე, ანუ 8 სექტემბერს, სამეწარმეო რეესტრში რეგისტრაციაში დაჩქარებული წესით გაატარდა, რისთვისაც კომპანიის წარმომადგენელმა დავით ოყროშიძემ 200 ლარი გადაიხადა.
შეგახსენებთ, რომ ობიექტი ელეტრონულ აუქციონზე, 19 ივლისს უნდა გაყიდულიყო, თუმცა მაშინ „სამშობლოს" მსურველი არ გამოჩენილა. კოსტავას ქ. №14-ში მდებარე 9447.00 კვ.მ არასასოფლოსამეურნეო დანიშნულების მიწის ნაკვეთისა და მასზე განთავსებული შენობა-ნაგებობების საწყისი ღირებულება მაშინ 16 მლნ. 200 ათას ლარად იყო განსაზღვრული.
ეკონომიკისა და მდგრადი განვითარების სამინისტროს გამომცემლობა "სამშობლოს" შენობა ჯერ კიდევ, 2011 წლის 12 ივლისს უნდა გაეყიდა, თუმცა სამინისტრომ აუქციონის ჩატერბის თარიღი 7 დღით, 19 ივლისამდე გადასწია. გამომცემლობა "სამშობლოს" შენობა აუქციონზე რამდენჯერმე იყო გატანილი, თუმცა ობიექტის გასხვისება ვერ მოხერხდა. გამომცემლობა "სამშობლოს" საპრივატიზაციო აუქციონი პირველად 2006 წლის 3 მარტს გაიმართა, მაშინ გამომცემლობის საწყისი ფასი 20 მლნ აშშ დოლარი იყო