"საქართველოს ლეიბორისტული პარტიის" საერთაშორისო მდივან ნესტან კირთაძის განცხადებით, 27 სექტემბრისთვის დაგეგმილი "ქართველთა მარში" მხოლოდ თეორიული პოლიტიკური პროექტია.
"შეფასება არ შემიძლია იმაზე რაც მხოლოდ თეორიული პოლიტიკური პროექტია, რომელსაც ყავს კონკრეტული ავტორები და აქვთ კონკრეტული მიზნები. ყველა პოლიტიკოსს აქვს თავისი ხედვა, თავისი პრინციპი და ისინი თავისუფალნი არიან თავიანთი პროექტების განხორციელებაში. ჩემის მხრიდან ვერ შევაფასებ იმას რაც არ მესმის, რაც არ ვიცი, რაც მინიმუმ ჩვენთან გააზრებული ან შეთანხმებული არ არის. მე ამას ვამბობ ავტორების მიმართ და კონკრეტულად, მართალი გითხრათ არ ვიცი ავტორები ვინ არიან", - განაცხადა ნესტან კირთაძემ "ჯი-ეიჩ-ენთან" საუბრისას.
მისი თქმით, თუ ეს ვინმესთვის არის საინტერესო საკუთარი ძალების დასათვალიერებლად, საკუთარი შესაძლებლობების დასათვალიერებლად საკუთარი თავისთვისაც და სხვებისთვისაც, ეს სხვა ამბავია.
"27 სექტემბერი სოხუმის დაცემის დღეა და ქართული პოლიტიკური გონი ვფიქრობ უმჯობესი იქნება თუ ურთიერთობების აღდგენისკენ იქნება მომართული. რაც შეეხება იმას თუ რა რაოდენობის ხალხი მივა. მე მაინც მიზან-შედეგობრივი შეფასების მომხრე ვარ, იმისთვის, რომ შეფასება არ იყოს მყისიერი და წამიერი. რა მაქვს მხედველობაში - როდესაც აგვისტოს ცნობილი სისხლიანი მოვლენების შემდგომ მოხდა გაეროს უშიშროების საბჭოს წევრი ქვეყნის რუსეთის და სხვა სახელმწიფოების მიერ აფხაზეთისა და ცხინვალის რეგიონის დამოუკიდებლად აღიარება, მართალი გითხრათ ველოდი, რომ რამდენიმე ადამიანი მაინც შეიკრიბებოდა თბილისის მთავარ მოედანზე და რამდენიმე ტრანსფარანტს მაინც გამოფენდა. არცერთი ადამიანი, არცერთი მოქალაქე არ დამდგარა და არ გაუპროტესტებია აი ეს მოვლენა. რამდენიმე წლის შემდეგ, 27 სექტემბერს, სოხულის დაცემის ტრაგიკული დღეს, რომელიც მომავლის სრულიად სხვანაირ შესაძლებლობებს და ვალდებულებებს იძლევა, მე მაინცდამაინც ამას ვერ ვხედავ რაღაცა ტიპის პოლიტიკურ აქციას. მე ყველას მინდა წარმატება ვუსურვო იმაში რაც საქართველოს წაადგება", - აღნიშნა კირთაძემ.
შეგახსენებთ, რომ "ეროვნული ფორუმი" 27 სექტემბერს ფართომასშტაბიანი აქციის გამართვას აპირებს.
