სტიქიისგან დაზიანებული ინფრასტრუქტურის აღსადგენად მთავრობამ ლაგოდეხის, გურჯაანის, სიღნაღის და საგარეჯოს მუნიციპალიტეტებს 3 მილიონი ლარი გამოუყო.
როგორც კახეთის საინფორმაციო ცენტრს კახეთის რეგიონული განვითარების სამსახურის უფროსმა ლაშა ჩივიაშვილმა განუცხადა, მთავრობის განკარგულებით ლაგოდეხის მუნიციპალიტეტს 1 850 000 ლარი, გურჯაანის რაიონს 400 000 ათასი, საგარეჯოს 700 000 ათასი, ხოლო სიღნაღს 50 000 ლარი გამოეყო.
„სამუშაოების ჩატარების ვადები შეზღუდული არ არის. აღსანიშნავია, რომ გამოყოფილი თანხა დაზიანებული ობიექტების სრულად აღსადგენად საკმარისი არ არის და ეს მხოლოდ სამუშაოების ჩატარების პირველ ეტაპზეა გათვლილი. დანარჩენ თანხას მთავრობა როდის გამოყოფს, ამ ეტაპზე ჩემთვის უცნობია", - აღნიშნა ლაშა ჩივიაშვილმა.
21 აგვისტოს სტიქიამ კახეთის რეგიონს 6,8 მილიონი ლარის ზარალი მიაყენა. ყველაზე მეტად ლაგოდეხის რაიონი დაზარალდა, სადაც ზარალის ოდენობა 5 მილიონი ლარია. საგარეჯოს რაიონს 1 300 000 ლარის ზარალი მიადგა, გურჯაანს 500 000 ლარის.