"ვეძებთ ნიჭიერ ადამიანებს, რომლებსაც იდეალური სმენა და ხმა აქვთ. გვინდა, 10-20-კაციანი ჯგუფი შევქმნათ, რომელთაც ამერიკიდან მასწავლებლებსა და პროდუსერებს ჩამოვუყვანთ. ეს კონკურსი ახალგაზრდა ნიჭიერი ადამიანების საერთაშორისო ასპარეზზე გაყვანას გულისხმობს", - განუცხადა "ჯი-ეიჩ-ენს" "Georgian Dream"-ის პრესსამსახურის წარმომადგენელმა თამთა ასლანიშვილმა.

კასტინგის ბოლო ვადა 1-ელ ოქტომბრამდეა. ჟიურის წარმომადგენლების ვინაობა კონფიდენციალურია, თუმცა როგორც "Georgian Dream"-ის პრესამსახურში აცხადებენ, ბერა ივანიშვილი თითოეულ კონკურსანტს თავად მოუსმენს.

"ბერას ძალიან უნდა, ბევრი ნიჭიერი ადამიანი ჩაერთოს კონკურსში. ის ყველა მათგანს მოუსმენს და დააფიქსირებს საკუთარ აზრს. სამომავლოდ, შეიძლება გამარჯვებულთან დუეტიც კი ჩაწეროს", - განაცხადა ასლანიშვილმა.

შეგახსენებთ, რომ "Georgian Dream"-ის დამფუძნებელი საავტორო სასიმღერო ჟანრის ახალგაზრდა წარმომადგენელი, მუსიკოს-შემსრულებელი ბერა ივანიშვილია. ის ქართული შოუბიზნესის ხელშეწყობას, საკუთარი შემოქმედებითი გეგმების რეალიზაციასა და საერთაშორისო სახელის მქონე მუსიკოსთა ქართველებისთვის გაცნობას სწორედ ამ კომპანიის მეშვეობით გეგმავს.