დუშეთის მუნიციპალიტეტის საკრებულოს გადაწყვეტილებით, დუშეთში 34 ქუჩას სახელი შეეცვლება. დუშეთში სულ 56 ქუჩაა. ქალაქში დღემდე არსებობს ლენინის, 1905 წლის რევოლუციის, ორჯონიკიძის, კომკავშირის, ცხაკაიას, შაუმიანის და მახარაძის სახელობის ქუჩები. დუშეთის მთავარი ქუჩა კი ისევ სტალინის სახელს ატარებს.
დუშეთის მუნიციპალიტეტის საკრებულოსა და გამგეობის ადმინისტრაციული შენობა სტალინისა და რუსთაველის ქუჩების გადაკვეთაზეა. გამგეობას ოფიციალურ მისამართად რუსთაველის ქუჩა აქვს მითითებული, თუმცა, ქუჩას მთელ სიგრძეზე სტალინის სახელობის აღმნიშვნელი აბრები აქვს. დუშეთის მუნიციპალიტეტის საკრებულოს გადაწყვეტილებით, სტალინის ქუჩას დავით აღმაშენებლის სახელი დაერქმევა, გამგეობის წინ არსებულ ცენტრალურ მოედანს კი სამასი არაგველის.
დუშეთსა და მის მიმდებარე რამდენიმე სოფელში დღემდე ბევრი უსახელო ქუჩაა. დუშეთის მუნიციპალიტეტის საკრებულოს გადაწყვეტილებით, სახელებს ამ ქუჩებსაც მიანიჭებენ. ახალ სახელებს საკრებულო ადგილობრივ მოსახლეობასთან შეთანხმებით შეარჩევს.
დუშეთის ზოგიერთ ქუჩას სახელი უკვე შეუცვალეს. ქალაქში ფარნავაზის, ცოტნე დადიანის და ჭონქაძის სახელობის ქუჩებიცაა, თუმცა სახელშეცვლილი ქუჩების უმრავლესობაზე ძველი აბრები დღემდე არ არის ჩამოხსნილი.
როგორც მცხეთა-მთიანეთის საინფორმაციო ცენტრს დუშეთის მუნიციპალიტეტის გამგეობაში განუცხადეს, ძველი აბრები ახლებით მას შემდეგ შეიცვლება, როცა სამოქალაქო რეესტრი დუშეთში დამისამართების პროცესს დაასრულებს. ახალი აბრების დამზადებას და განთავსებას ტენდერში გამარჯვებული კომპანია უზრუნველყოფს. დამისამართების პროცესი, სავარაუდოდ, ოქტომბერში დასრულდება
