მტკვრის მარჯვენა და მარცხენა სანაპიროზე დიდი რაოდენობის თევზის დახოცვა ჟანგბადის ნაკლებობამ გამოიწვია. ამის შესახებ "ჯი-ეიჩ-ენს" გარემოს ეროვნული სააგენტოს გარემოს დაბინძურების მონიტორინგის დეპარტამენტის უფროსმა მარინა არაბიძემ განუცხადა.

"ჩვენ სამი სინჯი ავიღეთ ყოფილ კინოთეატრ "ნაკადულიდან", ორთაჭალის ჰესთან ხიდიდან და ზაჰესის ჰესთან ასევე ხიდიდან. შემოწმების შემდეგ დადგინა, რომ თევზების დახოცვა გამოიწვია წყალში ჟანგბადის ნაკლებობამ, რაც გამოწვეული იყო შეწოვილი ნაწილაკების მაღალი კონცენტრაციით. თუმცა, მინდა გითხრათ კიდევ ერთი ლაბორატორიული შემოწმების შემდეგ დადგინდა, რომ ნაწილაკების კონცენტრაციის დონე იკლებს", - განაცხადა არაბიძემ "ჯი-ეიჩ-ენთან" საუბრისას.

თევზების დახოცვის სულ სხვა ვერსიას აქვეყნებს გაზეთი "ალია". როგორც ერთ-ერთმა მშენებლმა გააზეთს განუცხადა, მტკვარში აზოტნარევი მჟავის ჩადინება მოხდა.

"ყველამ იცის, რომ პრეზიდენტის რეზიდენციის მშენებლობა ჯერ არ დასრულებულა, მაგრამ დასრულდა იმ გვირაბის გაყვანა, რომელიც მტკვირს სანაპიროს უერთებს პრეზიდენტის სასახლეს. ჩვენი ჯგუფი ამ გაყვანაზე არ მუშაობდა, მაგრამ ბიჭებისგან ვიცი, რომ გვირაბი აფეთქების შედეგად არ გაუყვანია. სპეციალური მჟავაა, რომელიც ქანებს შლის და მოცულობას ათავისუფლებს", - განაცხადა მშენებელმა.

ჟურნალისტის კითხვაზე თუ რა მჟავაა ეს, მშენებელი პასუხობს, რომ ეს აზოტნარევი მჟავაა.

"არ ვიცი ზუსტად, მყარ მასას შლის და ფხვიერად აქცევს. ვიცი მხოლოდ, რომ ურალის მთებში მოიპოვება. საიდან ჩამოჰქონდათ, არ ვიცი. ძლიერმოქმედი ტოქსინია. სწორედ მისი ჩადინება მოხდა მტკვარში და ამან გამოიწვია თევზის ხოცვა", - განმარტავს მშენებელი "ალიასთან" საუბარში.

შეგახსნებთ, რომ 15 აგვისტოს დღის მეორე ნახევარში მდინარე მტკვრის მარჯვენა და მარცხენა სანაპიროზე დიდი რაოდენობით დახოცილი თევზი ამოტივტივდა.