თბილისის ანძის მმართველი კომპანია "გოლდენ კომი" გახდა. შპს "ალფაკომის" სახელმწიფო საკუთრებაში არსებულ 100-პროცენტიანი წილის მართვის უფლებით გადაცემის მიზნით ელექტრონული აუქციონი გუშინ გაიმართა, რომელშიც მხოლოდ კომპანია "გოლდენ კომი" იღებდა მონაწილეობას.
"ჯი-ეიჩ-ენის" მიერ მოპოვებული ინფორმაციით, შპს "გოლდენ კომის" იურიდიული მისამართია თბილისი,. ვაკე-საბუერთალოს რაიონი, აღმაშენებლის ხეივნის მე-5 კილომეტრი. კომპანია რეგისტრირებულია 2011 წლის 11 ივლისს. კომპანიის დირექტორია ვასილ ბოლაშვილი, რომელსაც ასევე ეკუთვნის კომპანიის 100 %-იანი წილი. კომპანიის რეგისტრაციაზე განაცხადი ბოლაშვილს 2011 წლის 8 ივლისს აქვს შეტანილი და კომპანია ერთი სამუშაო დღის ვადაშია რეგისტრირებული. კომპანიის რეგისტრაციისათვის გადახდილი მოსაკრებელი შეადგენს 105 ლარს.
ეკონომიკისა და მდგრადი განვითარების სამინისტროს ინფორმაციით, ელექტრონულმა აუქციონმა შპს "ალფა-კომის" სახელმწიფო საკუთრებაში არსებული 100-პროცენტიანი წილის ახალ მმართველად გამოავლინა კომპანია "გოლდენ კომი". ახალმა ინვესტორმა "ალფა-კომს" პროფილი უნდა შეუნარჩუნოს. "
"ალფა-კომის" მართვის უფლება გაიყიდა 110 000 ლარად.
ახალი ინვესტორი "ალფა-კომში" უახლოესი 4 წლის მანძილზე 12 მილიონი დოლარის ინვესტიციას განახორციელებს, მოხდება ანძის ტექნიკური გადაიარაღება და დაინერგება დღეს არარსებული ახალი ტიპის სატელეკომუნიკაციო სერვისები და გაუმჯობესდება არსებული.
აუქციონის შედეგად თბილისის სატელევიზიო ანძა არ გაყიდულა. შპს "ალფა-კომი", რომლის ერთ-ერთი აქტივიც თბილისის სატელევიზიო ანძაა, კომპანია "გოლდენ კომს" მხოლოდ 4 წლით გადაეცა მართვაში". ნათქვამია სამინისტროს განცხადებაში.
მართვის უფლების ამღების მიერ მართვის უფლებით გადაცემის საფასურის გადახდა ყოველწლიურად, შემდეგი გრაფიკის მიხედვით მოხდება: პირველი წლის საფასური - 2012 წლის 1 აგვისტომდე; მეორე წლის საფასური - 2013 წლის 1 აგვისტომდე; მესამე წლის საფასური - 2014 წლის 1 აგვისტომდე; მეოთხე წლის საფასური - 2015 წლის 1 აგვისტომდე.
იმავდროულად კომპანიას 4 წლის განმავლობაში, 12 მილიონი აშშ დოლარის ინვესტიციის განხორციელება მოუწევს.
ობიექტის დებიტორული დავალიანება 6 988 202 ლარი, ხოლო კრედიტორული დავალიანება 2 917 158 ლარია.
შეგახსენებთ, რომ შპს "ალფაკომი" საქართველოს ტელერადიოცენტრს რამდენიმე თვის წინათ ეწოდა. მის შემადგენლობაში 35 სატელევიზიო და 34 რაიოდარხი შედის. მის შემადგენლობაში არსებული ერთ-ერთი მნიშვნელოვანი ობიექტი თბილისის ანძაა. ობიექტის საპრივატიზაციოდ გატანას ოპოზიციის, არასამთავრობო ორგანიზაციებისა და ჟურნალისტების ნაწილი ეწინააღმდეგება. მათი მოსაზრებით, ხელისუფლებას ობიექტის გასხვისება მედიის საქმიანობის შეზღუდვისა და მასზე ზეწოლისათვის სჭირდება.