ჩინეთ-საქართველოს შორის პირდაპირი ავიარეისის ამოქმედების შემდეგ, საქართველოში არამარტო ჩინელი ვიზიტორების, არამედ აზიის სხვა ქვეყნების წარმომადგენელთა რიცხვი გაიზარდა, რომლებიც საქართველოში ჩინეთის გავლით ჩამოდიან, ამის შესახებ საქართველოს ეკონომიკისა და მდგრადი განვითარების მინისტრმა ვერა ქობალიამ საქართველო-ჩინეთის ბიზნესფორუმის დაწყების წინ განაცხადა.
ფორუმი ორგანიზებულია საქართველოს ეკონომიკისა და მდგრადი განვითარების სამინისტროს, ეროვნული საინვესტიციო სააგენტოს, სავაჭრო-სამრეწველო პალატისა და დამსაქმებელთა ასოციაციის მიერ.
ჩინეთის სახალხო რესპუბლიკის დელეგაციას, რომელშიც ჩინეთის ხელისუფლების და ბიზნესის წარმომადგენლები შედიან, სინძიან-იუღურეთის ავტონომიური რეგიონის კომერციის დეპარტამენტის გენერალური დირექტორის მოადგილე სუნ ჭენსიაო ხელმძღვანელობს.
ეკონომიკისა და მდგრადი განვითარების მინისტრმა ფორუმის მონაწილეებს სიტყვით მიმართა, რომელშიც აქცენტი გააკეთა საქართველოსა და ჩინეთს შორის მზარდი ეკონომიკური ურთიერთობების მნიშვნელობაზე.
ამასთან, როგორც ვერა ქობალიამ პრესისთვის მიცემულ კომენტარში აღნიშნა, გასულ თვეში ჩინეთ-საქართველოს შორის პირდაპირი ავიარეისის ამოქმედებამ შედეგად მოიტანა, რომ დღეს თბილისში უკვე იმყოფება ჩინეთის დელაგეცია, რომელიც საქართველოში სხვადასხვა მიმართულების საინვესტიციო პროექტების განხორცილებითაა დაინტერესებული, მათ შორის სამშენებლო, სოფლის მეურნეობის, ჰიდროენერგეტიკის სექტორებში.
ვერა ქობალიას განცხადებით, პირდაპირმა ავიარეისმა ასევე გაზარდა საქართველოში არამარტო ჩინელი ვიზიტორების, არამედ აზიის სხვა ქვეყნების წარმომადგენელთა რიცხვი, რომლებიც საქართველოში ჩინეთის გავლით ჩამოდიან. "ამასთან, ეს ხელს უწყობს ქართულ ბიზნესს, რათა ჩვენი პროდუქცია ჩინეთის ბაზარზე უფრო მარტივად შევიდეს", - აღნიშნა მინისტრმა.
საქართველოსთან უფრო ფართო ბიზნესურთიერთობის საჭიროებაზე ისაუბრეს ჩინეთის დელეგაციის წარმომადგენლებმაც, მათი განცხადებით, ამ მხრივ საკმაოდ კარგი პერსპექტივები არსებობს.
ბიზნესფორუმის ფარგლებში ქართულ-ჩინური ბიზნესსექტორის წარმოამდგენლებს შორის B2B შეხვედრებიც გაიმართა