ეკონომიკური თავისუფლების შესახებ კანონზე, დღეს ფინანსთა ფინანსთა მინისტრმა დიმიტრი გვინდაძემ დეტალურად ისაუბრა და აღნიშნა, რომ კანონმდებლობა მეტად მნიშვნელოვანია ქვეყანაში ბიზნესისა და ზოგადად კერძო სექტორის კიდევ უფრო განვითარებისა და წახალისებისათვის.

"ეს არის ძალიან მნიშვნელოვანი კანონი, უპირველეს ყოვლისა კერძო სექტორისა და ზოგადად ბიზნესის განვითარების კუთხით. ეკონომიკური თავისუფლება სამი ძირითადი პრინციპიდან გამომდინარეობს, ესენია მთავრობის მცირე ზომა, გადასახადების დაბალი დონე და კონსერვატიული და გონივრული მაკროეკონომიკური პოლიტიკა. ყველაზე მნიშვნელოვანი პრინციპი, რომელსაც თავისუფლების აქტი ითვალისწინებს არის ის, რომ ახალი საერთო-სახელმწიფოებრივი გადასახადების შემოღება შესაძლებელია მხოლოდ რეფერენდუმის გზით, რაც ფისკალური დემოკრატიის კუთხით მნიშვნელოვანია. ეს ნიშნავს იმას, რომ გაგრძელდება მთავრობის ლიბერალური საგადასახადო პოლიტიკა, რაც ნიშნავს დაბალ გადასახადებს და მარტივ საგადასახადო სისტემას, რაც კერძო სექტორისთვის მნიშვნელოვანი გზავნილია"- აღნიშნა დიმიტრი გვინდაძემ.

ფინანსთა მინისტრის განმარტებით, - ეკონომიკური თავისუფლების შესახებ კანონის მეორე პრინციპის მიხედვით ნაერთი ბიუჯეტის ხარჯებისა და არაფინანსური აქტივების ზრდის დონე არ შეიძლება აღემატებოდეს მშპ-ს 30 %-ს.
"ეს ნიშნავს, რომ მთავრობის ზომა არ შეიძლება იყოს მთლიანად ეროვნული ეკონომიკის 30 %-ზე მაღალი. ეს პრინციპი გამომდინარეობს ჩვენი მრავალწლიანი დაკვირვებების შედეგად, სხვადასხვა ქვეყნების ეკონომიკური განვითარების დინამიკაზე. დაკვირვების შედეგად გამოჩნდა, რომ ის ქვეყნები სადაც არის შედარებით მცირე ზომის მთავრობაა და არის შექმნილი ყველა პირობა კერძო სექტორის განვითარებისათვის - გამოირჩევა ეკონომიკური განვითარების უფრო მაღალი დინამიკით, ვიდრე ის ქვეყნები სადაც მთავრობა წარმოადგენს მთლიანი ეკონომიკის 50-60 %-ს", - განაცხადა ფინანსთა მინისტრმა.

აღსანიშნავია, რომ ეკონომიკის გრძელვადიანი და სტაბილური განვითარებისათვის, ხელისუფლება კანონში ადგენს მაკროეკონომიკური პარამეტრების მაქსიმალურ ზღვარს.

ეკონომიკური თავისუფლების შესახებ კანონის მესამე პირინციპის მიხედვით, საბიუჯეტო ხარჯების შეფარდება მთლიან შიდა პროდუქტთან უნდა იყოს არაუმეტეს 30%-სა. რაც თავის მხრივ ნიშნავს იმას, რომ მთავრობა კვლავ გააგრძელებს „ქამრების შემოჭერის" პოლიტიკას და მომავალშიც, თავად შეზღუდავს აღმასრულებელ ხელისუფლებას, რათა მისი შენახვა დამატებით ტვირთად არ დააწვეს ქვეყნის ეკონომიკას.

გარდა ამისა, ხელისუფლება დამატებით ნაბიჯებს დგამს ფისკალური სტაბილურობის შენარჩუნების კუთხით. კერძოდ, კანონი ითვალისწინებს: ბიუჯეტის დეფიციტის შეფარდებას მშპ-სთან არაუმეტეს 3%-სა და სახელმწიფო ვალის შეფარდებას მშპ-სთან არაუმეტეს 60%-სა. დღეისათვის სახელმწიფო ვალის შეფარდება მშპ-სთან მიმართებაში შეადგენს 43 %-ს.

"გამომდინარე ეკონომიკური ზრდის მაღალი ტემპებიდან ჩვენ ვფიქრობთ, რომ 2012 წლიდან დაიწყება კლებადი დინამიკა და ჩვენ ჩამოვალთ 38-35 %-ზე, რაც ძალიან ბევრს ნიშნავს ფისკალური სტაბილურობის კუთხით"- აღნიშნავს გვინდაძე.
ფინანსთა მინისტრი ფიქრობს, რომ აღნიშნული პარამეტრები საშუალებას იძლება, რომ გრძელვადიან პერიოდში მაკროეკონომიკური სტაბილურობა იქნება შენარჩუნებული, რაც გაზრდის ქვეყნის მიმართ ინვესტორთა ნდობას და შესაბამისად, გაიზრდება ქვეყანაში ინვესტიციების შემოდინება.
"ინვესტორი რომელიც დღეს ქვეყანაში ფულს აბანდებს ის უყურებს არა დღევანდელ საგადასახადო ჩარჩო პირობებს, არამედ მას უნდა ქონდეს მყარი გარანტია იმისა, რომ ის რეფორმები და დაბალი გადასახადები, რომელიც ქვეყანაში არსებობს სამომავლოდ არ შეიცვლება. საუბარია ისეთ ინვესტორებზე, რომელის საქართველოში თანხებს არა ერთი და ორი წლით აბანდებენ, არამედ 10-15 და მეტი წლით", - აცხადებს დიმიტრი გვინდაძე.

იმავდროულად, კანონში ამავე დროს აღნიშნულია, რომ განსაკუთრებით სიტუაციაში მთავრობას შეუძლია დაარღვიოს კანონით დადგენილი ჭერები, თუმცა საქართველოს მთავრობა ვალდებულია შეიმუშაოს და საქართველოს პარლამენტს დასამტკიცებლად წარუდგინოს შემდგომი ორი წლის ბიუჯეტის პარამეტრები, რომლებიც უნდა ითვალისწინებდეს დადგენილ ზღვრებში დაბრუნების გეგმას.

ფინანსთა მინისტრის განმარტებით, აღნიშნული კანონი 2013 წლის 31 დეკემბრიდან ამოქმედდება, თუმცა ის უკვე დღეიდან საქართველოს საშუალებას მისცემს გახდეს უფრო მიმზიდველი და საიმედო ქვეყანა ინვესტორებისათვის, რაც ხელს შეუწყობს ინვესტიციების მოზიდვას და ახალი სამუშაო ადგილების შექმნას.
ფინანსთა სამინისტროში აცხადებენ, რომ დღეს მათთვის, ვინც გადაწყვეტს საქართველოში ფულის დაბანდებას, ასევე საქართველოში მოქმედი ყველა ბიზნეს სუბიექტისთვის არსებობს მკაფიო, ლიბერალური კანონმდებლობა, რომლითაც დაცული და გარანტირებულია თავისუფალი ეკონომიკის ფუნდამენტური პრინციპები.

შეგახსენებთ, რომ გასულ კვირას საქართველოს პარლამენტმა მიიღო ეკონომიკური თავისუფლების შესახებ კანონი, რომლის ძირითდი პრინციპები პრეზიდენტ მიხეილ სააკაშვილის მიერ იქნა ინიცირებული, რითაც კიდევ ერთხელ დამტკიცდა, რომ ქვეყნის ხელისუფლება მსოფლიო ეკონომიკური კრიზისით გამოწვეული სირთულეების მიუხედავად, ლიბერალური ეკონომიკური პოლიტიკის ერთგულია. ამ კანონის მთავარი პრინციპებია - თავისუფლება, პასუხისმგებლიანი მაკროეკონომიკური პოლიტიკა და დაბალი გადასახადები.