"ასოშიეითედ პრესის" ფოტორეპორტიორ შახ აივაზოვის განცხადებით ის მოწმის სტატუსით დაკითხეს. მან „მოდულის" შენობა დაახლოებით ერთი საათის წინ დატოვა. მისი თქმით, სხვა დაკავებული ფოტორეპორტიორების შესახებ ინფორმაციას არ ფლობს. აივაზოვი შენობიდან ადვოკატის გარეშე გამოვიდა.
შეგახსენებთ, რომ გვიან ღამით სამართალდამცველებმა 5 ფოტორეპორტიორი დააკავეს. საქართველოს შინაგან საქმეთა სამინისტროს კონტრდაზვერვის დეპარტამენტის მიერ დაკავებულები არიან: ზურაბ ქურციკიძე (ევროპის ფოტოსააგენტოს წარმომადგენელი საქართველოში), ირაკლი გედენიძე (პრეზიდენტის ადმინისტრაციის პრესსამსახურის ფოტოგრაფი), მისი მეუღლე ნათია გედენიძე და გიორგი აბდალაძე (საქართველოს საგარეო საქმეთა სამინისტროს ფოტოგრაფი).
შსს-ს ინფორმაციით, დაკავებულ პირებს ბრალი ედებათ ერთ-ერთი უცხო ქვეყნის სპეცსამსახურის საფარქვეშ მოქმედი ორგანიზაციისთვის, საქართველოს ინტერესების საზიანოდ, მათი სამსახურებრივი მდგომარეობიდან გამომდინარე, სხვადასხვა სახის ინფორმაციის მიწოდება.
აღნიშნულ საქმესთან დაკავშირებით მიმდინარეობს გამოძიება.
