"მთავარი პასუხისმგებლობა პრეზიდენტს ეკისრება და მე მინდა, რომ მშვიდად იყოს ჩვენი პრეზიდენტიც და ჩვენი ქვეყანაც. იმედი მაქვს, ყველაფერი კარგად იქნება", - ამის შესახებ სრულიად საქართველოს კათოლიკოს პატრიარქი, მცხეთა-თბილისის მთავარეპისკოპის და ბიჭვინთისა და ცხუმ-აფხაზეთის მიტროპოლიტი ილია მეორემ იოანე ნათლისმცემელის შობისადმი მიძღვნილი საზეიმო წირვის შემდეგ ქადაგებისას ბრძანა. მისი თქმით, უმჯობესი იქნება, თუ პრეზიდენტი კანონს იქამდე გადადებს, სანამ ყველაფერი ზუსტად განსაზღვრული და შემოწმებული არ იქნება.
თუმცა დღეს გახდა ცნობილი, რომ პრეზიდენტმა ამ კანონს ხელი 5 ივლისს მოაწერა, 6 ივლის გამოქვეყნდა საკანონმდებლო მაცნეში, რაც იმას ნიშნავს, რომ კანონი ძალაში შევიდა.
"კანონი იმდენად მნიშვნელოვანი და საშიშია, რომ კანონმდებლებს მისი მიღებისას უნდა ეფიქრათ, თუ რა შედეგს მოიტანდა ის 10 და 100 წლის შემდეგ", - ბრძანა პატრიარქმა.
"ჩვენ ანალიტიკური აზროვნება გვაკლია. ანალიზი უნდა გავაკეთოთ საქმის დაწყებამდე და არა დამთავრების შემდეგ. ჩვენი პოზიცია არ არის ის, რომ რელიგიებს სტატუსი არ უნდა მიეცეთ, ჩვენი პოზიციაა, დავსხდეთ მეცნიერებთან, სასულიერო პირებსა და სპეციალისტებთან ერთად და ეს საკითხი განვიხილოთ. სამწუხაროდ, კანონმდებლებმა ისე იჩქარეს, რომ ის ერთ დღეში დაამტკიცეს", - ბრძანა პატრიარქმა.
უწმინდესმა ბრძანა, რომ მის სიტყვებში სომხების საწინააღმდეგო აზრი არ დევს და სხვადასხვა საუბრის მიუხედავად, ქართველები და სომხები იყვნენ და მუდამ ძმები დარჩებიან.
"როცა სომხებს უჭირდათ, ჩვენ მუდამ ვეხმარებოდით და ისინიც გვეხმარებოდნენ, როცა ჩვენ გვიჭირდა. ეს კანონი იმდენად რთული და საპასუხისმგებლოა, რომ შეიძლება ბოროტად იქნას გამოყენებული. ამიტომ ყველაფერი უნდა გაეთვალისწინებინათ. როდესაც ამბობენ, ეკლესია სახელმწიფო საქმეში რატომ ერევა, მინდა გითხრათ, რომ ეს არ არის მხოლოდ სახელმწიფოს საქმე, ეს არის საკითხი, რომელიც შეეხება მთელს ჩვენს ერს, ეკლესიას და განსაკუთრებით სახელმწიფოს", - ბრძანა უწმინდესმა.
პატრიარქის ბრძანა, რომ ამ საკითხთან დაკავშირებით ბოლო დღეების განმავლობაში საზოგადოებაში აზრთა სხვადასხვაობა რელიგიებს შორის ურთიერთობას დაძაბავს, რაც არ შეიძლება.
ქადაგების დასასრულს, პატრიარქმა საქართველო გამთლიანება კიდევ ერთხელ ისურვა და ასევე სიმართლისა და ჭეშმარიტების ძიების აუცილებლობაზე ისაუბრა. დღესვე უწმინდესმა ავჭალაში მდებარე იოანე ნათლისმცემლის სახელობის ტაძრის წინამძღვარი იღუმენი ლაზარე გრძელიშვილი არქიმანდრიტის ხარისხში აიყვანა და ტაძარს მისთვის შეწირული ჯვარი უსახსოვრა.
