ევროკავშირი დროებით აჩერებს სუნელების იმპორტს ეგვიპტიდან - გერმანელი ექსპერტების დასკვნით, მომაკვდინებელი ვირუსის კერა სწორედ ამ ქვეყნიდან შემოტანილ სუნელებში, კერძოდ კი უცხო სუნელში აღმოჩნდა.
ვირუსოლოგები დარწმუნებული არიან, რომ კიტრი და სხვა ბოსტნეული, რომელიც ადრე ვირუსის კერად მიიჩნეოდა, არაფერ შუაშია. სპეციალისტები აცხადებენ, რომ ვირუსი უცხო სუნელშია. ეს დასკვნა იმ პაციენტების გამოკვლევის შემდეგ გააკეთეს, რომლებიც საფრანგეთის ერთ-ერთ ქალაქში სუნელებით შენელებული საწებლით დაინფიცირდნენ. შემთხვევა 8 ივნისს მოხდა.
ინფორმაციის საბოლოოდ დასადასტურებლად ლაბორატორიული კვლევები ამ დრომდე გრძელდება. ე-კოლმა ევროპაში 50-ზე მეტი ადამიანი იმსხვერპლა.