„ქართული პარტიის" დაკავებულ წევრებთან დაკავშირებით „დაიცავი საქართველო" და მოძრაობა „სოლიდარობა უკანონო პატიმრებს" განცხადებას ავრცელებს.
„ქართულ პარტიის ‘' - წევრებისა და მხარდამჭერების დაკავების ბოლო დღეების სერიალი აშკარად ატარებს პოლიტიკური ნიშნით განსხვავეული პოზიციის მქონე ადამიანების დევნის სახეს და ემსახურება შიშის დანერგვისა და ანგარიშწორების ამოცანას. მიუღებელია ადამიანის უფლებათა დამცველებისათვის ადამიანების დაკავება უსაფუძვლო არგუმენტებით და მტკიცებულებების გარეშე. კიდევ უფრო შემაძრწუნებელია დაკავებულთა წამების, სასტიკი და არაადამიანური მოპყრობის ფაქტები, რასაც ადგილი აქვს ბოლო დღეებში. საერთაშორისო და შიდასამართალი გამონაკლისის გარეშე, კრძალავს და დაუშვებლად მიიჩნევს ადამიანების წამებას. ამგვარი ქმედება დასჯადია საქართველოს სისხლის სამართლის კოდექსით", - ნათქვამია განცხადებაში, რომელსაც ხელს ეკა ბესელია და გოგა ხაინდრავა აწერენ.
მათივე ინფორმაციით, ამ დროისთვის დაკავებულია 16 ადამიანზე მეტი და ზეწოლა და ფიზიკური ძალადობა ხორციელდება.
„აღნიშნული ფაქტი კიდევ ერთხელ ადასტურებს სააკაშვილის რეჟიმის მხრიდან განსხვავებული აზრის ადამიანების დევნას და შევიწროვებას. ასევე, პოლიციის მიერ აკრძალული, დანაშაულებრივი მეთოდების გამოყენებას აღიარებითი ჩვენების მირების მიზნით. დაუშვებლად მივიჩნევთ ამ ფაქტებს და მივმართავთ საერთაშორისო უფლებადამცველ ორგანიზაციებს და ევრო - სტრუქტურებს, რათა შესწავლილი და რეაგირებული იქნას თითოეული წამების და უკანონო მოპყრობის ფაქტი", - აღნიშნულია განცხადებაში.