დარიალის საბაჟო-გამშვები პუნქტით მოსარგებლე პირებს უკვე შესაძლებლობა აქვთ საქართველოში შემოსასვლელი ვიზები უშუალოდ გამტარ პუნქტზე მიიღონ.
როგორც საქართველოს საგარეო საქმეთა სამინისტროს განცხადებაშია ნათქვამი, ახალი წესი 2 ივლისიდან ამოქმედდა.
საბაჟო-გამშვებ პუნქტ „ყაზბეგის" საშუალებით გადაადგილებული პირებისათვის ვიზის გაცემის შეზღუდვის შესახებ 2010 წლის 26 თებერვლის N 62 ბრძანება ძალადაკარგულად საქართველოს საგარეო საქმეთა მინისტრის 2011 წლის 30 ივნისის N 159 ბრძანების შესაბამისად გამოცხადდა.
„აღნიშნული გადაწყვეტილება წარმოადგენს საქართველოს მიერ არჩეული სავიზო პოლიტიკის გაგრძელებას, რომლის მიზანია მაქსიმალურად ხელი შეუწყოს ადამიანთა გადაადგილებას ტურისტული, ბიზნესის, სამედიცინო თუ სხვა ჰუმანიტარული მიზნებით და ეს განხორციელდეს ნაკლები დროისა და ფინანსური დანახარჯებით თითოეული მოქალაქისათვის", - ნათქვამია საგარეო უწყების განცხადებაში.
