როგორც ,,ჯი-ეიჩ-ენს" საქართველოს ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა სამინისტროდან აცნობეს, ქარხანა დევნილი მოსახლეობის სოციალური პირობების გაუმჯობესების მიზნით შექმნილი პროექტის - "ახალი სამუშაო ადგილები შიდა ქართლის დევნილთათვის" ფარგლებში ამოქმედდა.

სამკერვალო ქარხანის გახსნას კობა სუბელიანი, გაეროს ლტოლვილთა უმაღლესი კომისარიატის წარმომადგენელი სიმონე ვოლკენი და შიდა ქართლის გუბერნატორი ზურაბ არსოშვილი დაესწრნენ.

სამკერვალოში 500 ერთეული სასკოლო ფორმა შეიკერება, რომელსაც გორის ყოფილი ბუფერული ზონის სოფლების 3 საჯარო სკოლა უფასოდ მიიღებს. სამკერვალოში დასაქმებულები არიან დევნილები და ადგილობრივები. სასკოლო ფორმების გარდა, სამკერვალო ფაბრიკაში დაგეგმილია სპორტული სამოსის, საძინებელის და სხვა სახის ტრიკოტაჟის დამზადება.

„დევნილი მოსახლეობის საცხოვრებელი ფართით უზრუნველყოფა საკმარისი არ არის. ჩვენი ერთ-ერთი პრიორიტეტია მათი დასაქმებაც. დონორების დახმარებით სამუშაო ადგილების შექმნის მსგავს მეთოდებს მივმართავთ. გარდა ამისა, დევნილ მოსახლეობას ასევე ვაძლევთ მიწებს, ვურიგებთ შინაურ ფრინველებსა და ცხოველებს. ვისაც შრომა შეუძლია და სურვილი აქვს სოფლის მეურნეობით დაკავდეს, ჩვენი მხრიდან ხელშეყწობა ყოველთვის იქნება. საცხოვრებელი ფართის უზრუნველყოფის გარდა, ჩვენი მთავარი პრიოპრიტეტია დევნილ მოსახლეობას გავუჩინოთ შემოსავლის წყარო და სხვის დახმარებაზე აღარ იყვნენ დამოკიდებული." - განაცხადა კობა სუბელიანმა

გაეროს ლტოლვილთა უმაღლესი კომისარიატის წარმომადგენელ სიმონე ვოლკენის თქმით კი „სახელმწიფომ ბევრი რამ გააკეთა დევნილთა სახცოვრებელი პირობების გასაუმჯობესებლად, ასევე მნიშვნელოვანია მათი შემოსავლის წყაროს გაუმჯობესება".

"სამუშაო ადგილი ადამიანს აძლევს იმედს. დარწმუნებული ვარ, ეს სამკერვალო სახლი მისცემს იმედს აქ დასაქმებულ ადამიანებს", - აღნიშნა გაეროს ლტოლვილთა უმაღლესი კომისარიატის წარმომადგენელმა.