უსაფრთხოების პოლიტიკის ექსპერტ ირაკლი სესიაშვილის შეფასებით, ავღანეთში სამხედრო კონტიგენტის გაზრდა იმ კონტექსტში, როცა შეერთებულ შტატებსა და ევროპის სხვადასხვა ქვეყანას საკუთარი სამხედრო შენაერთები გაჰყავს, საქართველოს ხელისუფლების ვიწროპოლიტიკურ მიზნებსა და ინტერესებს უკავშირდება.

„შექმნილ ვითარებაში ჩვენი ხელისუფლების "თავგამოდება" შეიძლება შეფასდეს, როგორც არამართლზომიერი გადაწყვეტილება. საქართველოს მიერ ავღანეთის სამშვიდობო მისიაში ჩვენი კონტრიბუცია ქვეყნის წინაშე არსებული პრობლემებისა და გამოწვევების მიმართ არაადეკვატურია. სწორედ ამიტომ მიმაჩნია, რომ ეს გადაწყვეტილება და შესაბამისი "თავგამოდება", პირველ რიგში, ემსახურება სააკაშვილისა და ამ ხელისუფლების ვიწროპოლიტიკურ მიზნებსა და ინტერესებს. კერძოდ იმას, რომ დასავლეთის გულისმოგებით, „ნაციონალურმა მოძრაობამ" მიიღოს დასავლეთის მხრიდან ლიბერალური დამოკიდებულება ქვეყანაში შექმნილი და მოსალოდნელი არადემოკრატიული პროცესების მიმართ. 2012 წლის არჩევნების შედეგების აღიარება-არაღიარებისთვის სააკაშვილი უკვე ამზადებს დასავლეთის განწყობებს", - განუცხადა სესიაშვილმა „ჯი-ეიჩ-ენს".

რაც შეეხება ავღანეთიდან სამხედრო კონტიგენტის ეტაპობრივად გაყვანის თაობაზე აშშ-ისა და საფრანგეთის მიერ მიღებულ გადაწყვეტილებას, ექსპერტის შეფასებით, ეს ნიშნავს, რომ სამშვიდობო მისია დასასრულს უახლოვდება.

„ავღანეთი აქილევსის ქუსლი გამოდგა. როგორც ჩანს, პროცესები, რომლებიც იქ მიმდინარეობს, დაუსრულებელი იქნება, ამიტომაც მიიღეს მისიის დასრულების შესახებ პოლიტიკური გადაწყვეტილება და ქვეყნის მართვის სადავეები და მათ შორის უსაფრთხოებაზე ფიქრი ადგილობრივ ხელისუფლებას გადაეცემა. საინტერესოა ისიც, რომ საკმაოდ უჩვეულო სტილში მიმდინარეობს მოლაპარაკებები შეერთებულ შტატებსა და თალიბებს შორის. არ გამოვრიცხავ, რომ თალიბებს ტერორისტული აქტებისა და წინააღმდეგობის შეწყვეტის საკითხი დაეყენებინოს, თუკი შეერთებული შტატები ქვეყნიდან ჯარებს გაიყვანდა. ამას ემატება ისიც, რომ ნატოს წევრ ქვეყნებს მისია უკვე ყელში ამოუვიდათ (მათ შორის ფინანსური თვალსაზრისით). ეს ყველაფერი კომპლექსში ქმნის გარემოს, რომ მისია უნდა დასრულდეს", - განმარტა ექსპერტმა.

სესიაშვილის აზრით, შეერთებული შტატები ავღანეთიდან, სავარაუდოდ, საბრძოლო ქვედანაყოფებს გაიყვანს, თუმცა მისიის დასრულების შემდეგაც იქ „ცალკე, მაგალითად, რამდენიმე ბაზის სახით მაინც დარჩება".

შეგახსენებთ, რომ საქართველო ავღანეთში სამხედრო კონტიგენტის ერთი ბატალიონით გაზრდას გეგმავს. ამის შესახებ საქართველოს თავდაცვის მინისტრმა ბაჩო ახალაიამ ბრიუსელში, NATO-ს თავდაცვის მინისტერიალში მონაწილეობის შემდეგ განაცხადა. ამჟამად ავღანეთში 925 ქართველი ჯარისკაცი იმყოფება. ახალაიას განმარტებით, 2012 წლის დასაწყისისთვის ეს რიცხვი გაორმაგდება და ავღანეთში, საერთაშორისო უსაფრთხოების მხარდამჭერ ძალებში, ნატოს არაწევრი ქვეყნებიდან, საქართველოს ყველაზე მეტი ჯარისკაცი ეყოლება. ავღანეთში, სამხედრო ოპერაციებისას ამ დრომდე, 8 ქართველი ჯარისკაცია დაღუპული.

საქართველოს ხელისუფლებისგან განსხვავებით, აშშ-ის ადმინისტრაცია ავღანეთში სამხედრო კონტიგენტის შემცირებას გეგმავს. თეთრი სახლის განცხადებით, ავღანეთში ჯარის რაოდენობის შეკვეცასა და გამოყვანის სისწრაფეზე, განცხადებას ქვეყნის პრეზიდენტი გააკეთებს.