ვანუატუს პრემიერ-მინისტრმა ედვარდ ნატაპეიმ სეპარატისტული აფხაზეთის ე.წ. დამოუკიდებლობის აღიარების გადაწყვეტილება გააუქმა. ინფორმაციას ამის შესახებ "Vanuatu Daily Post"-ი ავრცელებს.
პრემიერ-მინისტრის მიერ გავრცელებულ განცხადებაში ნათქვამია, რომ აფხაზეთი, რომლის დამოუკიდებლობა ყოფილმა პრემიერ -მინისტრმა თითქოს აღიარა გასულ თვეს, საქართველოსგან გამოყოფილი მისი ავტონომიური ოლქია.
ნატაპეი ასევე მნიშვნელოვნად აღიქვამს იმ ფაქტს, რომ მსოფლიოს ქვეყანათა უმრავლესობა აფხაზეთს საქართველოს ტერიტორიის განუყოფელ ნაწილად აღიარებს. მხოლოდ რუსეთმა, ნიკარაგუამ, ვენესუელამ და ნაურუმ აღიარეს მისი დამოუკიდებლობა.
მანვე განაცხადა, რომ მიიღო რა გადაწყვეტილება არ ეღიარებინა აფხაზეთის დამოუკიდებლობა, იგი შეუერთდა საერთაშორისო საზოგადოების უდიდეს ნაწილს ამ საკითხთან მიმართებაში.
პრემიერ-მინისტრმა ასევე დაავალა გაეროში ვანუატუს ელჩს დონალდ კალპოკასს საქართველოსთან ურთიერთობების დამყარება.
