ონის რაიონის სოფელ ღარში მცხოვრები 8 ადამიანის ადგილსამყოფელი, რომლებიც, სავარაუდოდ, რუსმა ოკუპანტებმა აიყვანეს, ამ დრომდე დაუდგენელია.
როგორც "ჯი-ეიჩ-ენს" შინაგან საქმეთა სამინისტროს ადმინისტრაციის უფროსმა, შოთა ხიზანიშვილმა განუცხადა, მათი სამძებრო სამუშაოები მიმდინარეობს.
ამასთან, ონის რაიონის გამგებლის ვალერიან გობეჯიშვილის ინფორმაციით, ახალგაზრდები სოფელ ღარს გუშინ, საეკლესიო დღესასწაულ - "საჯვარეობასთან" დაკავშირებით, მოსალოცად ესტუმრნენ, თუმცა იქედან აღარ დაბრუნებულან.
"ეს ადგილი ოსი სეპარტისტების მიერ კონტროლირებად ტერიტორიასთან ახლოს მდებარეობს. სავარაუდოდ, ახალგაზრდები ნასვამ მდგომარეობაში იყვნენ, გზა აერიათ, რაც, შესაძლოა, ოკუპანტების მხრიდან მათი დაკავების მიზეზი გამხდარიყო", - აღნიშნა "ჯი-ეიჩ-ენთან" საუბრისას გობეჯიშვილმა.
