სრულიად საქართველოს კათოლიკოს- პატრიარქმა, უწმინდესმა და უნეტარესმა ილია მეორემ მრევლთან ფოტოები გადაიღო.
ფოტოების გადაღების ინიციატივით საკვირაო ქადაგებისას გთავად უწმინდესი გამოვიდა, რის შესაბამისადაც, წირვის დასრულების შემდეგ მან მორწმუნეებთან ერთად ფოტოსურათების გადასაღებად სამების ტაძრის ეზოში გადაინაცვლა.
"ჩვენს ეზოში ბევრი ვარდია. ამდენი ყვავილი ერთად არ მინახავს. წირვის შემდეგ ყველანი ერთად გავიდეთ და სამახსოვრო ფოტო გადავიღოთ", - მიმართა უწმინდესმა მრევლს.
აღნიშნულ კონტექსტში, ილია მეორემ დღევანდელ საკვირაო ქადაგებისას ყურადღება სილამაზის მნიშვნელობაზე გაამახვილა და აღნიშნა, რომ სილამაზე ერთ-ერთი მცნებაა.
"არის ერთი დიდი მცნება, რომელზეც ყველაზე ნაკლებად ვფიქრობთ, ეს სილამაზეა. ყველაზე დიდი სილამაზეა უფალი. უმაღლესი და უზენაესი სილამაზე ღმერთია. ადამიანმა ყოველთვის უნდა მიაქციოს ყურადღება ამ მცნებას... პატრიარქმა ტაძარში მისვლისას მრევლი ყოველთვის ლამაზად ჩაცმული უნდა იყოს. ახალგაზრდები განსაკუთრებით ლამაზად ჩაცმულები მიდიან თუნდაც თეატრში, მაგრამ როდესაც ტაძარში მიდიან, აცვიათ სახლის ჩასაცმელი. ეს არ არის სწორი, რადგან უფალთან მიდიხარ. ამიტომ ყველაზე უკეთესი, რაც გაქვს, ის უნდა გეცვას. ჩვენ ყველამ ყურადღება უნდა მივაქციოთ სილამაზეს", - აღნიშნა უწმინდესმა.
ამასთან, ილია მეორემ უფლისადმი მადლიერების აუცილებლობაზეც იქადაგა და მრევლს მოუწოდა, უფლისგან მიღებული წყალობისთვის მადლიერების გამოხატვა არ დაავიწყდეთ.
"ჩვენი ლოცვა შედგება თხოვნისგან. ჩვენ გვავიწყდება მადლობა. ვიღებთ უფლისგან იმას, რასაც ვითხოვთ, მაგრამ მადლობა გვავიწყდება. მადლობა ყოველთვის უნდა გვახსოვდეს", - ბრძანა უწმინდესმა.
