ევროპარლამენტი რეკომენდაციას აძლევს ყველა ქვეყნის საჯარო სტრუქტურებს, მიზნად დაისახონ „დიდი ოთხეულის" გარდა სხვა აუდიტორული კომპანიების მომსახურებით სარგებლობა. ამისათვის კი აუცილებელია, რომ სახელმწიფო ტენდერების პროცედურა სამართლიანად ჩატარდეს და მასში მონაწილეობა დიდ ოთხეულთან ერთად სულ ცოტა ორმა სხვა ფირმამაც შეძლოს. ასევე უნდა გაუქმდეს კომერციული ხელშეკრულებების ის პუნქტები, რომლებიც აუდიტორის არჩევას ზღუდავს.

საერთაშორისო აუდიტორული კომპანიის BDO-ს მმართველი პარტნიორის, ბუღალტერთა და აუდიტორთა ფედერაციის გამგეობის თავმჯდომარის ზურაბ ლალაზაშვილის განცხადებით, საერთაშორისო აუდიტორულ ბაზარზე 4 მსხვილი აუდიტორული კომპანია, ე. წ. „დიდი ოთხეული" (KPMG, Deloitte touch, Earnest and Young, Price Waterhouse Cooper) განსაკუთრებულად პრივილეგირებულ მდგომარეობაშია. მართალია არც ერთი ქვეყნის კანონმდებლობა არ ითხოვს, რომ სახელმწიფო დაწესებულებების ან კერძო კომპანიების აუდიტი მხოლოდ ამ 4 კომპანიიდან ერთ-ერთმა ჩაატაროს, თუმცა მაგალითად დიდ ბრიტანეთში, ჰოლანდიაში, იტალიაში, ირლანდიაში, პორტუგალიასა და ბევრ სხვა ევროპულ ქვეყანაში ამ კომპანიების კონცენტრაცია მსხვილი კომპანიების აუდიტორული მომსახურების ბაზარზე 90%-ზე მეტს შეადგენს.

ეს ბევრი მიზეზითაა გამოწვეული, მათ შორის წლების განმავლობაში ჩამოყალიბებული სტერეოტიპებით. მაგალითად, თუკი რომელიმე კომპანიას საერთაშორისო ბირჟაზე აქციების გატანა სურს, არაპირდაპირი მოთხოვნა არსებობს, რომ კომპანიის აუდიტი „დიდი ოთხეულიდან" რომელიმეს მიერ იყოს ჩატარებული. ასეთივე არაპირდაპირი მოთხოვნა აქვთ საერთაშორისო ბანკებსა და საფინანსო ინსტიტუტებს. თუ რომელიმე კომპანიას მათგან სესხის მიღება „კარგი" პირობებით, მაგალითად დაბალი საპროცენტო განაკვეთით, ხანგრძლივი ვადით მიღება სურს, აუდიტი რომელიმე ამ კომპანიის მიერ უნდა იყოს ჩატარებული.

ზურაბ ლალაზაშვილის განმარტებით, მართალია ევროპარლამენტის მითითებას მხოლოდ რეკომენდაციის სახე აქვს, თუმცა უკვე ჩანს ტენდენცია, რომ აუდიტორულ ბაზარზე სიტუაცია შეიცვლება. მისი თქმით, რამდენიმე წლის წინ ამ საკითხზე საუბარიც არ იყო. ახლა კი გაჩნდა იმის შესაძლებლობა, რომ მსოფლიო აუდიტორულ ბაზარზე ყველა კვალიფიციური აუდიტორული კომპანია თანაბარ პირობებში შეძლებს მუშაობას.

შეგახსენებთ, შპს "BDO" თერთმეტწლიანი გამოცდილებით მეოთხე უმსხვილესი აუდიტორული კომპანიაა საქართველოს ბაზარზე და წარმოადგენს "BDO" საერთაშორისო აუდიტორული ქსელის წევრ ფირმას. "BDO" აუდიტორული კომპანიების მეხუთე უმსხვილესი საერთაშორისო გაერთიანებაა, რომელიც მსოფლიოს 119 ქვეყანაშია წარმოდგენილი. "BDO" არის ქსელის და მისი წევრი ფირმების საერთო სავაჭრო სახელი, თუმცა საკუთარ ქვეყანაში თითოეული წევრი ფირმა დამოუკიდებელ იურიდიულ პირს წარმოადგენს