"თუ საქართველოს აქვს სურვილი, თავისი თავი კიდევ ერთხელ გამოსცადოს - ნება მისია", - აცხადებს აფხაზი ოპოზიციონერი რაულ ხაჯიმბა კითხვაზე: შესაძლებელია თუ არა საქართველომ ისარგებლოს ბაღაფშის გარდაცვალებით და აფხაზეთში მდგომარეობის დაძაბვას შეეცადოს.
ეს განცხადება რაულ ხაჯიმბამ "ლენტა.რუ"-სთვის მიცემულ ინტერვიუში გააკეთა.
"საქართველოს სახელმწიფოს თავისი პრობლემები საკმარისად აქვს. თავად სახელმწიფოს შიგნით არ არის სიმშვიდე. ჩემი აზრით, საქართველოში არსებული სიტუაცია საუკეთესო როდია. სცადონ, თუ უნდათ. მე არ ვსაუბრობ იმაზე, რომ რაღაც დანადგარებს გავშლით და ომს დავიწყებთ. ეს უბრალოდ აბსურდია, არავისთან ომს არ ვაპირებთ. მაგრამ თუ საქართველოს ასეთი სურვილი აქვს - კიდევ ერთხელ გამოსცადოს თავისი თავი, ვფიქრობ, ჩვენ მოგვეპოვება შესაბამისი შესაძლებლობები იმისათვის, რათა კიდევ ერთხელ ვანახოთ, თუ რამდენად ვართ მზად ჩვენი სამშობლოს დასაცავად", _ აცხადებს ხაჯიმბა.
