სამტრედიის რაიონის სოფელ ბაშს ვარციხე-ჰესი ტბორავს. ჰესის მეოთხე კასკადის გაუმართავი სადრენაჟო მილიდან გადმოსული წყალი ბაშელების სახნავ-სათეს მიწებს, ეზოებსა და შინაურ ცხოველებს ანადგურებს.
ბაშში მცხოვრები 273 ოჯახი მიყენებული ზარალის ანაზღაურებას ითხოვს. დაზარალებული სოფლის მოსახლეობა სასამართლოს გზით 203 000 ლარის მიღებას ცდილობს.
ვარციხე-ჰესის კასკადები წყალტუბოს ტერიტორიაზეც მდებარეობს, რის გამოც სოფელ ბაშის მოსახლეობამ თავდაპირველად სწორედ წყალტუბოს საქალაქო სასამართლოს მიმართა.
წყალტუბოს სასამართლომ 203 000 ლარის გადახდა ვარციხ-ჰესის ადმინისტრაციას დააკისრა, თუმცა განაჩენი ამ დრომდე არ აღსრულებულა. სოფელ ბაშის მოსახლეობა ზარალის ანაზრაურებას ამჯერად საქართველოს ეკონომიკის სამინისტროს სთხოვს და უწყებას ქუთაისის სააპელაციო სასამართლოში უჩივის. დაზარალებული მოსახლეობის ინტერესებს საქართველოს ახალგაზრდა იურისტთა ასოციაციის ქუთაისის ფილიალის ერთ-ერთი ადვოკატი, გიორგი ჭიქაბერიძე იცავს.
"გვეხოცება წვრილფეხა და მსხვილფეხა პირუტყვი. ვარციხ-ჰესის მეოთხე კასკადი ჩვენს სოფელში, ბაშში მდებარეობს, მას 20 მდინარე ერთვის. გაუმართავი სადრენაჟო არხი წყლის ნაკადს ვეღარ იტევს და წყალი პირდაპირ ეზოებსა და სახლებში გვივარდება. შინაურ ცხოველებისა და მფრინველების განადგურეის თემა რა მოსატანია, ამ უბედურებას უკვე რამდენიმე ადამიაიც ემსხვერპლა. ვითხოვთ ზარალის ანაზღაურებას და ყურადღებას. მალე სოფელ ბაშის ნაცვლად ეს ხელისუფლება და ეკონომიკის სამინისტრო ერთ დიდ ტბას მიიღებს", - განაცხადა "ჯი-ეიჩ-ენ"-თან საუბრისას ბაშის ერთ-ერთმა მკვიდრმა რომან ნუცუბიძემ.
ვარციხ-ჰესს სულ 4 კასკადი გააჩნია და მათგან ერთ-ერთი სწორედ სოფელ ბაშს აზარალებს. შეგახსენებთ, რომ ვარციხ-ჰესის ადმინისტაციას თავად ბაღდათის რაიონის სოფელ ვარციხის მოსახლეობაც უჩივის. რამდენიმე დღის წინ ჰესის ადმინისტრაციამ წყლის ფარები გაუფრთხილებლად გახსნა, რასაც 61 წლის მურთაზ გაბუნიას სოცოცხლე ემსხვერპლა. გარდაცვლილის სოფელი ამ დრომდე უშედეგოდ ეძებს.
