პოლიტოლოგ გია ნოდიას 26 მაისს, აქციის ძალისმიერი მეთოდებით აღკვეთა გამართლებულად მიაჩნია.
"26 მაისის ღამეს პოლიციას საქმე ჰქონდა არა მშვიდობიან დემონსტრანტებთან, როგორც ზოგიერთი უფლებადამცველი და პოლიტიკოსი აცხადებს, არამედ შეიარაღებულ ექსტრემისტულ ჯგუფთან, რომლის მიზანი იყო ძალადობის გამოწვევა. აქციის ორგანიზატორთა გადაწყვეტილება, ჩაეშალათ ეროვნული დღესასწაულის აღნიშვნის ზეიმი, ხელისუფლების ძალადობაზე შეგნებულ გამოწვევას გულისხმობდა. არსებობს სერიოზული საფუძველი ვიფიქროთ, რომ ეს ხორციელდებოდა საქართველოს მიმართ მტრულად განწყობილი სახელმწიფოს პირდაპირი თუ ირიბი მხარდაჭერით. ყოველივე ამის გათვალისწინებით და იმ პირობებში, როდესაც აქციის გაგრძელებას აღარ ჰქონდა არავითარი ლეგალური საფუძველი, სახელმწიფოს მხრიდან სრულიად გამართლებული იყო აქციის აღკვეთა ძალის გამოყენებით. გამართლებულია ექსტრემისტების აქციის დასაშლელად კანონით გათვალისწინებული ყველაზე ეფექტური მეთოდების გამოყენებაც, რათა ექსტრემისტებს მინიმალური შანსები დარჩენოდათ ფართომასშტაბიანი ძალადობის პროვოცირებისთვის", - განაცხადა კოალიცია „ევროპული საქართველოსთვის წარმომადგენელმა დღეს გამართულ პრესკონფერენციაზე.
ამასთან, ნოდია მიიჩნევს, რომ საზოგადოების მხრიდან მხოლოდ იმაზე აპელირება, რომ პოლიციის მხრიდან არაპროპორციული ძალის გამოყენება მოხდა და იმის არაღნიშვნა, რომ აქციის მონაწილეები პროვოკაციაზე მიდიოდნენ, დაუშვებელია, რადგან ამით დისბალანსი ირღვევა.
„მოსახლეობას, ბუნებრივია, მოეთხოვება ხელისუფლების განსჯა, მაგრამ ასევე მოეთხოვება პოლიტიკური ტენდენციების სწორი შეფასება. ჩვენ საქმე გვქონდა ერთის მხრივ, ჯგუფთან, რომლის მიზანი იყო სამოქალაქო ომის გამოწვევა და არეულობის ინსცენირება და მაორეს მხრივ, ძალასთან, რომელსაც ეს ყველაფერი უნდა შეეჩერებინა. ვფიქრობ, ამ ძალამ თავისი ფუნქცია შეასრულა, თუმცა, რა თქმა უნდა, არსებობს ეჭვები, რომ ეს გადამეტებული სიმკაცრით მოხდა", - აღნიშნა ნოდიამ.
მისივე განმარტებით, პოლიციის მხრიდან ძალის გადამეტება შესამჩნევი იყო, მაგრამ ეს, სავარაუდოდ, მათი არასაკმარისი პროფესიონალიზმითა და არაზუსტი გათვლით უნდა ყოფილიყო გამოწვეული და არა იმით, რომ „ასეთი პრინციპი ჰქონდათ".
"ნაკლებსავარაუდოა, რომ სამართალდამცველების პრინციპი ყოფილიყო მომიტინგეების მიმართ სასტიკი ანგარიშსწორება და ისე მოქცევა, თითქოს კანონი არ აინტერესებდათ. ეს უფრო არასაკმარისი პროფესიონალიზმისა და არაზუსტი გათვლის ბრალი იყო", - დასძინა პოლიტოლოგმა.
