როცა ატყდა ამ თემაზე ერთი ამბავი, თითქოს პროტესტის მთავარი მოტივატორი იყო ის, რომ ირაკლი კობახიძემ განაცხადა, რომ საქართველო დროებით აჩერებს გაწევრიანებასთან დაკავშირებით ყველა მოლაპარაკებას, ჩვენ მზად ვიქნებით 2028 წლისთვისო - ამ საკითხის ირგვლივ ჩვენ მაშინაც ვსაუბრობდით, რომ როცა შეჩერებაზეა საუბარი, ჯერ კიდევ ივნისის თვეში იყო გაცხადებული ევროკავშირის მხრიდან, მაგრამ ვინ მოგისმინა?! არ მოგისმინა, იმიტომ, რომ ეს იყო ხელოვნურად შექმნილი პროცესი ,- ამის შესახებ მიხეილ ყაველაშვილმა განაცხადა. ის გამოეხმაურა ტელეკომპანია „რუსთავი 2-ის“ გამოქვეყნებულ წერილს, რომელიც ევროკავშირის ელჩმა პაველ ჰერჩინსკიმ საქართველოს საგარეო საქმეთა სამინისტროს გაუგზავნა.
ყაველაშვილის განცხადებით, მოლაპარაკების შეჩერებას ევროკავშირს კი არ აბრალებენ, არამედ ფაქტებზე საუბრობენ.
„როცა ატყდა ამ თემაზე ერთი ამბავი, თითქოს პროტესტის მთავარი მოტივატორი იყო ის, რომ ირაკლი კობახიძემ განაცხადა, რომ საქართველო დროებით აჩერებს გაწევრიანებასთან დაკავშირებით ყველა მოლაპარაკებას, ჩვენ მზად ვიქნებით 2028 წლისთვისო - ამ საკითხის ირგვლივ ჩვენ მაშინაც ვსაუბრობდით, რომ როცა შეჩერებაზეა საუბარი, ჯერ კიდევ ივნისის თვეში იყო გაცხადებული ევროკავშირის მხრიდან, მაგრამ ვინ მოგისმინა?! არ მოგისმინა, იმიტომ, რომ ეს იყო ხელოვნურად შექმნილი პროცესი. მთავარი რა არის, რომ ჩვენმა საზოგადოებამ მოუსმინოს ხელისუფლებას და რეალურად შეაფასოს. არავინ არ სთხოვს იმ საზოგადოებას, რომ გინდა თუ არა მომხრე იყავი ამ ხელისუფლების, მაგრამ რეალობის აღქმა, სამართლიანობის განცდა, შენი სახელმწიფოს მიმართ სამართლიანი დამოკიდებულება უნდა გქონდეს და შეფასებაში იყო ობიექტური, ვინ რა განცხადებას აკეთებს. გული გვწყდება, რომ რიგი ადამიანებისა არიან დეზინფორმაციის ან ორმაგი სტანდარტის მსხვერპლი და აგრძელებენ მსხვერპლშეწირვას თავისდა საზიანოდ.“- განაცხადა ყაველაშვილმა.
მისივე თქმით, საქართველო პარალელურ რეჟიმში აგრძელებს განვითარებას.
„საქართველო პარალელურ რეჟიმში აგრძელებს განვითარებას. ჩვენ კი არ ვაბრალებთ ევროკავშირს, ვსაუბრობთ ფაქტებით. ჩვენი საზოგადოება ბევრად მეტს იმსახურებს, უფრო გონიერია. ირაკლი კობახიძემ მეორე დღესვე გააკეთა განცხადება, რომ ვარ მზად, ნებისმიერ დროს, როგორც კი ევროკავშირი მზად იქნება ჩვენთან მოლაპარაკების გახსნისთვის, დავიწყოთ მოლაპარაკებაო. ეს არის ფაქტი“, – განაცხადა მიხეილ ყაველაშვილმა.
