ბაღდათის რაიონის სოფელ ვარციხეში მდებარე ღვთისმშობლის მიძინების სახელობის ეკლესია ინგრევა. მეჩვიდმეტე საუკუნის ტაძარს რეკონსტრუქცია გასული საუკუნის 90-იან წლებში ჩაუტარდა, თუმცა მას შემდეგ, 19 იანვრის მიწისძვრამ ტაძრის კედელზე არსებული ბზარი გააღრმავა და საკურთხევლის კედელი შუაზე გაყო. დაზიანებული და გაბზარულია იატაკიც, სახურავიდან ჩამოსულ წვიმის წყალს კი მრევლი ცელოფნებით უმკლავდება.
ეკლესიის წინამძღვარმა, დეკანოზნა მარკოზ სვანიძემ დახმარებისთვის საქართველოს კულტურის ყოფილ მინისტრს ნიკოლოზ ვაჩეიშვილს მიმართა, თუმცა კულტურული მემკვიდრეობის დაცვის ეროვნული სააგენტოს გენერალური დირექტორი ვარციხის ეკლესიის ბედით ამ დრომდე არ დაინტერესებულა.
"ნიკოლოზ ვაჩეიშვილს დახმარებისთვის არა-ერთხელ მივმართეთ, თუმცა უშედეგოდ. ის სპეციალური ჯგუფის გამოგზავნას და არსებული ვითარების ადგილზე შესწავლას დაგვპირდა. მას შემდეგ დიდი დრო გავიდა, ეკლესია კი პრაქტიკულად ნადგურდება და ინგრევა. კვირის წირვებისას კედლებიდან და ჭერიდან აგურები ცვივა, რაც მრევლს სერიოზულ საფრთხეს უქმნის. ამ ეკლესიის მრევლი მხოლოდ 200 კაცია და არსებული პრობლემების მოგვარება მათი სახსრებით შეუძლებელია. ეს მიუხედავად იმისა, რომ სოფლისდ პატარა ტაძრისთვის ორას კაციანი მრევლი არც თუ ისე ცოტაა", - განაცხადა "ჯი-ეიჩ-ენთან" საუბრისას დეკანოზმა მარკოზ სვანიძემ.
ვარციხის ღვთისმშობლის მიძინების სახელობის ეკლესია წმინდა მეფის თამარის დროინდელ ციხე-ქალაქის ტერიტორიაზე მდებარეობს. ტაძრის ეზოში 365-ფუთიანი ძველებური ღვინის ქვევრია გათხრილი. ადგილობრივების გადმოცემით, აღნიშნული ქვევრი უნიკალურია და ის სწორედ თამარის ეპოქას უკავშირდება.
