ფრანგულ დოვილში "დიდი რვიანის" სამიტის წევრებმა ერთობლივი, შემაჯამებელი დეკლარაცია მიიღეს სახელწოდებით "განახლებული არჩევანი თავისუფლებისა და დემოკრატიის სასარგებლოდ".
25 გვერდისაგან შემდგარ სამიტის შემაჯამებელ დეკლარაციაში ლიბიაში სისხლისღვრის შეჩერების პრობლემაა წინ წამოწეული. დიდი რვიანის წევრი ყველა ქვეყნის ხელმძღვანელი აცხადებს, რომ ლიბიის ლიდერი მუამარ კადაფი უნდა გადადგეს. ადრე ვრცელდებოდა ინფორმაცია იმის შესახებ, რომ აშშ-სა და საფრანგეთის პრეზიდენტებმა ბარაკ ობამამ და ნიკოლა სარკოზიმ რუსეთის ლიდერს დიმიტრი მედვედევს სთხოვეს ამ საკითხში კადაფზე გავლენა მოეხდინა და მისთვის ამის სანაცვლოდ ქვეყნის წინააღმდეგობის გარეშე დატოვების უზრუნველყოფა შეეთავაზებინა.
დოკუმენტში ასევე წინ არის წამოწეული საკითში რუსეთის ვაჭრობის მსოფლიო ორგანიზაციაში გაწევრიანების შესახებ. როგორც დოკუმენტშია ნათქვამი "რვიანი" ხელს შეუწყობს იმას, რომ რუსეთი 2011 წელს ვაჭრობის მსოფლიო ორგანიზაციაში გაწევრიანდეს.
ამას გარდა, მიღებულ დოკუმენტში ასევე ნახსენებია ის თემები, რომლებიც სამიტზე განიხილეს: იაპონიასთან სოლიდარობა, ინტერნეტის განვითარება, გლობალური ეკონომიკის პრობლემები, საჭრობა, ინოვაციები, ეკოლოგიური და კლიმატური ცვლილებები, ბირთვული უსაფრთხოება, საერთაშორისო მშვიდობისა და უსაფრთხოების განვითარება, რეგიონალური პრობლემები - ახლო აღმოსავლეთი და ჩრდილოეთ აფრიკა, კორეის ნახევარკუნძული და ირანი.
"რვიანმა" სერიოზული შეშფოთება გამოთქვა თეირანის მიერ განხორციელებული ქმედებების გამო, რომელიც გამუდმებით ახდენს გაეროს უშიშროების საბჭოს რეზოლუციებისა და ატომური ენერგიის საერთაშორისო სააგენტოს მოთხოვნებს.
ამავე დროს "რვიანის" ლიდრებმა ხაზი გაუსვეს, რომ აღიარებენ ირანის უფლებას მშვიდობიან ბირთვულ პროგრამაზე "თუმცა ყოველივე ამას თან სდევს ვალდებულებები, რომლებიც ყველა ქვეყანამ, მათ შორის ირანმაც უნდა შეასრულოს".
"დიდი რვიანის" მომდევნო სამიტი 2012 წელს აშშ-ში გაიმართება.
