აშშ-ის პრეზიდენტმა ბარაკ ობამამ, საფრანგეთის პრეზიდენტმა ნიკოლა სარკოზიმ და რუსეთის პრეზიდენტმა დიმიტრი მედვედევმა მთიან ყარაბაღთან დაკავშირებით ერთობლივი განცხადება მიიღეს, რომელშიც აზერბაიჯანისა და სომხეთის ლიდერებს მოუწოდეს, "მოახდინონ პოლიტიკური ნების დემონსტრირება და დაასრულონ მუშაობა მთიანი ყარაბაღის კონფლიქტის დარეგულირების ძირითად პრინციპებზე ივნისში დაგეგმილ სომხეთ-აზერბაიჯანის სამიტზე".
განცხადების მიხედვით, პროცესის "გაჭიანურება მხოლოდ კითხვის ნიშანს გააჩენს მხარეთა ნებაში მოლაპარაკებების მიღწევის შესახებ".
"როდესაც მოლაპარაკება მიღწეული იქნება, მზად ვართ, დავემოწმოთ ამ პრინციპების მიღების ფორმალურობას, ხელი შევუწყოთ სამშვიდობო შეთანხმების შემუშავებას და შემდეგ ერთობლივად, მხარი დავუჭიროთ მის შესრულებას ჩვენს საერთაშორისო პარტნიორებთან ერთად", _ ნათქვამია განცხადებაში.
"ვადასტურებთ, რომ მხოლოდ მოლაპარაკებათა გზით მიღწეული დარეგულირება მიგვიყვანს მშვიდობამდე, სტაბილურობამდე და შერიგებამდე და რეგიონალური განვითარებისა და თანამშრომლობისთვის შესაძლებლობებს შექმნის", _ ნათქვამია განცხადებაში.
ობამა, სარკოზი და მედვედევი დარწმუნებულნი არიან, რომ "მოვიდა დრო მთიანი ყარაბაღის კონფლიქტის ყველა მხარემ გადადგას ნაბიჯი მშვიდობიანი დარეგულირებისაკენ".
ისინი აღნიშნავენ, რომ ახლანდელი კონფრონტაციული სიტუაციის წარმოქმნა ძალის გამოყენებამ წარმოქმნა.
"მისი განმეორება კი მხოლოდ ახალ უბედურებებს და ნგრევას მოიტანს და მას საერთაშორისო საზოგადოება დაგმობს. დაბეჯითებით მოვუწოდებთ ლიდერებს, მოამზადონ მოსახლეობა მშვიდობისთვის და არა ომისთვის", _ ნათქვამია განცხადებაში.
