25 მაისს პოლიციამ პროფესიონალურად იმოქმედა. ამის შესახებ "ჯი-ეიჩ-ენს" საპარლამენტო უმრავლესობის ერთ-ერთმა ლიდერმა გოკა გაბაშვილმა პოლიციისა და სპეცრაზმის მიერ გუშინ "სახალხო კრების" აქციის დაშლის შეფასებისას განუცხადა.
"პოლიციამ ყველაფერი გააკეთა იმისთვის, რომ არ მომხდარიყო აქციის დაშლა, მათ შორის რამდენჯერმე მოხდა ორგანიზატორების გაფრთხილება, რომ აქციის გაგრძელების უფლება ღამის 12 საათის შემდეგ აღარ ჰქონდათ", - აღნიშნა გაბაშვილმა.
მისივე თქმით, ხელისუფლებამ მომიტინგეებს აქციის ჩასატარებლად რამდენიმე ალტერნატიული ადგილიც შესთავაზა, რომ სიტყვის თავისუფლად გამოხატვის საშუალება არ შეზღუდულიყო.
"მაგრამ აზრის გამოხატვის თავისუფლებაზე იქ არ იყო ლაპარაკი. ეს იყო ის, რაზეც რამდენიმე დღის განმავლობაში ეს ხალხი ღიად საუბრობდა. მათი სურვილი იყო შეტაკება, სისხლი, დაპირისპირება და პოლიციამ, ჩემი აზრით, პროფესიონალურად იმოქმედა", - აღნიშნა "ჯი-ეიჩ-ენთან" საუბრისას დეპუტატმა.
ამასთან, გაბაშვილმა დაღუპულების ოჯახს სამძიმარი გამოუცხადა.
"სამწუხაროდ არის მსხვერპლი, რადგან ეს თავზეხელაღებული ადამიანები ისე თავქუდმოგლეჯილები გარბოდნენ, რომ ხალხს მანქანით გადაუარეს. ეს ძალიან სამწუხაროა და ვუსამძიმრებ დაღუპულთა ოჯახებს", - აღნიშნა გოკა გაბაშვილმა.
