საქართველოს პრეზიდენტის განცხადებით, მიუხედავად იმისა, რომ ქვეყანა მე-20 დამოუკიდებლობის წლისთავს ზეიმობს, რეალურად სუვერენული ქართული სახელმწიფოს ფუნდამენტი ახლა იყრება.
„რეალურად, ჩვენ მხოლოდ ახლა ვქმნით ქართული სახელმწიფოებრიობის ტრადიციას. ახლა ვყრით სუვერენული ქართული სახელმწიფოს ფუნდამენტს. სკეპტიკოსებისთვის ადვილია წუწუნი და ქილიკი ხარვეზებზე, რაც ჯერაც გააცნია ქართულ სახელმწიფოს. რა თქმა უნდა, ასეთი ხარვეზები არის, მაგრამ ჩვენ ვმუშაობთ მის აღმოფხვრაზე. ჩვენ ახლა ვაყალიბებთ მოქალაქეობრივ ტრადიციას. სახელმწიფოსა და მოქალაქეთა შორის ორმხრივი პასუხისმგებლობის კულტურას. ჩვენ ახლა ვეჩვევით, რომ ვცხოვრობთ საკუთარ სახელმწიფოში. ახლა ვაცნობიერებთ, რომ სისტემა, რომელშიც ჩვენი საზოგადოება არსებობს, არ არის თავს მოხვეული, რომელიმე უცხო ძალის მიერ, არამედ მას ვქმნით ჩვენ, ჩვენი ხელებით, საკუთარი ოჯახის, ქვეყნის და შვილების უკეთესი მომავლის უზრუნველსაყოფად", - განაცხადა მიხეილ სააკაშვილმა დღევანდელ სამხედრო აღლუმზე სიტყვით გამოსვლისას.
მისივე განმარტებით, ქართული საზოგადოება „დღეს ბევრ რამეს" სწავლობს.
„ჩვენ ახლა ვაცნობიერებთ, რომ კანონის უზენაესობა საკუთარი სამშობლოს წარმატებას და გაძლიერებას ნიშნავს. ახლა ვისისხლხორცებთ, რომ სამხედრო სამსახური ეს არის არა უცხო ჯარში სამსახური, არამედ ეს არის ჩვენი ჯარი, ჩვენი არმია, ჩვენი სისხლი და ხორცი, ჩვენი სამშობლოს დამცველები და თითოეული ჩვენგანის ვალია მათთან ერთად ჩვენი სამშობლოს დაცვა. ჩვენ ახლა ვაცნობიერებთ, რომ საზოგადოებას სჭირდება კანონის უზენაესობა, რომ კანონის უზენაესობის გარეშე არ არსებობს არანაირი წესრიგი და ნამდვილი დემოკრატია. ახლა ვისისხლხორცებთ, რომ ნახევარი ათასწლეულის მანძილზე პირველად გვყავს სამოქალაქო სამსახური, ჯარისკაცები და ოფიცრები, რომლებიც დაიბადნენ თავისუფალი საქართველოს შვილებად და სამხედრო სკოლა გაიარეს დამოუკიდებელ საქართველოში, რომელთაც თავისი სახელმწიფო სამსახური ისწავლეს თავისუფალ საქართველოში და ესეც უნიკალური მონაპოვარია", - აღნიშნა მიხეილ სააკაშვილმა.
ამასთან, ქვეყნის პირველი პირის თქმით, ის ამაყია, რომ ყველა აღნიშნული მიმართულებით პირველი ნაბიჯის გადადგმის პროცესში ქართველი ხალხი აღმოჩნდა უსაზღვროდ ნიჭიერი, მონდომებული და წარმატებული.
