მინისტრმა კობა სუბელიანმა და ჩეხეთის რესპუბლიკის საგარეო საქმეთა მინისტრმა კარელ შვარცენბერგმა ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში საქართველოში დაბრუნებული მიგრანტებისთვის მობილურობის ცენტრი გახსნეს. პროექტის ძირითად მიზანს წარმოადგენს უზრუნველყოს საზღვარგარეთ არალეგალურად მყოფი მიგრანტების საქართველოში დაბრუნება და რეინტეგრაცია.
პროექტი დაფინანსებულია ევროკავშირის მიერ და ხორციელდება ჩეხეთის შინაგან საქმეთა სამინისტროს, ევროკავშირის 8 წევრი ქვეყნის და საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ერთობლივი ძალისხმევით.
პროექტი ხელს შეუწყობს: მიგრაციის სფეროში პოლიტიკის შემუშავებას და შესაბამისი სამართლებრივი ბაზის ჩამოყალიბებას; მობილურობის ცენტრის შექმნას, რომელიც საქართველოში დაბრუნებულ მიგრანტებს უზრუნველყოფს კონსულტაციებით შემდეგ საკითხებზე: პროფესიული სწავლება, დასაქმება, ბიზნესის დაწყება, სამედიცინო დახმარება და დროებითი თავშესაფრის მოძიება; საინფორმაციო კამპანიის წარმოებას, რომლის ფარგლებში მოხდება ინფორმაციის გავრცელება ლეგალური მიგრაციის და განსაკუთრებით შრომის მიგრაციის შესაძლებლობების, და ასევე არალეგალურ მიგრაციასთან დაკავშირებული რისკების შესახებ; დამატებით ორი კონსულტაციისა და დასაქმების ცენტრის ჩამოყალიბებას;
"პროექტის ფარგლებში სამინისტროში შეიქმნა "მობილურობის ცენტრი," რომლის ძირითადი ამოცანაა რეადმისიის ხელშეკრულებით სამშობლოში დაბრუნებული საქართველოს მოქალაქეების ქმედითი დახმარება - პროფესიული გადამზადებიდან დაწყებული დასაქმებისა და სამედიცინო კონსულტაციის ჩათვლით. საჭიროების შემთხვევაში, ცენტრი დაბრუნებულ მიგრანტებს შესთავაზებს დროებით განსახლებას, ასევე პროექტის ფარგლებში უცხოეთიდან დაბრუნებულ ჩვენი ქვეყნის მოქალაქეებს საშუალება ექნებათ მიიღონ ფინანსური დახმარება მცირე ბიზნესის დასაწყებად", - აღნიშნა კობა სუბელიანმა.
ჩეხეთის რესპუბლიკის საგარეო საქმეთა მინისტრმა კარელ შვარცენბერგმა კი აღნიშნა, რომ საქართველოს ჩეხეთის მაქსიმალური მხარდაჭერა ექნება: „კარგად ვიცით ის პრობლემები, რაც საქართველოში რეინტეგრაციის მხრივ არსებობს. ჩვენ საქართველოში მიმდინარე პროცესებზე საქმის კურსში ვართ და ჩვენი მხრიდან მაქსიმალური მხარდაჭერა გექნებათ."
მინისტრმა კობა სუბელიანმა და ჩეხეთის რესპუბლიკის საგარეო საქმეთა მინისტრმა კარელ შვარცენბერგმა ასევე ხელი მოაწერეს ურთიერთგაგების მემორანდუმს, რომელიც მიზნად ისახავს ზემოთ აღნიშნულ სამინისტროებს შორის თანამშრომლობის გაღრმავებას და მობილურობის ცენტრის ფუნქციონირების ხელშეწყობას.
მემორანდუმის ხელმოწერას საქართველოში ევროკავშირის წარმომადგენლობის ხელმძღვანელი ფილიპ დიმიტროვი, საქართველოში ჩეხეთის რესპუბლიკის სრულუფლებიანი ელჩი ივან იესტრაბი და სტუმრები დაესწრნენ.