"თავისუფალი-დემოკრატების" ლიდერის ირაკლი ალასანიას განცხადებით, ირაკლი ოქრუაშვილს მისთვის შეურაცხყოფის მიყენება არანაირად არ შეუძლია.
"ირაკლი ოქრუაშვილი შეურაცხყოფას ვერნაირად ვერ მომაყენებს. არ მგონია, რომ მისი განცხადებები იმდენად მნიშვნელოვანი იყოს, რომ მასთან დისკუსიაში ჩაბმა ღირდეს. მე მარტო ერთს ვიტყვი, რომ ყველა იმ ძალასთან მზად ვართ თანამშრომლობისთვის, რომელთა ქმედებებიც საქართველოს გასული საუკუნის 90-იან წლებში არ დააბრუნებს", - განაცხადა ალასანიამ ჟურნალისტებს ოქრუაშვილის მიერ მისი მისამართით გაკეთებულ განცხადებაზე კომენტირებისას.
შეგახსენებთ, რომ ქართული მედიისთვის მიცემულ ინტერვიუში "ქართული პარტიის" თანათავმჯდომარე ირაკლი ოქრუაშვილმა საარჩევნო გარემოზე მოლაპარაკებებში ჩართულ ოპოზიციურ პარტიებს ტაქტიკა დაუწუნა.
ოქრუაშვილმა ისინი ქართული პოლიტიკის შტრაიკბრეხერებად მოიხსენია და "ნაფტალინდაყრილებიი" უწოდა.
თავდაცვის ყოფილმა მინისტრმა განსაკუთრებით "თავისუფალი დემოკრატების" ლიდერი ირაკლი ალასანია გააკრიტიკა.
"ალასანია ერთადერთი ქალწული იყო ქართულ პოლიტიკაში, უდავოდ დიდი მოლოდინითა და მხარდაჭერის იმხელა რესურსით, რომელსაც მეც კი ვინატრებდი 2007 წელს, მაგრამ ისე სწრაფად და იაფად დააკარგვინა მიშამ უბიწოება, რომ მგონი თვითონაც ვერ მიხვდა", - განაცხადა ოქრუაშვილმა.
