შემოსავლების სამსახურის ახალი ინიციატივა - საწვავის ხარჯებში ჩამოწერის პროცედურის გამარტივების შესახებ, უკვე ძალაშია.
შემოსავლების სამსახურის ინფორმაციით, დღემდე არსებული პროცედურით, საწვავის ხარჯვის აღრიცხვისა და შემდგომ მისი ხარჯებში ჩამოწერის პრინციპი გართულებული იყო, რაც მეწარმეებს სერიოზულ პრობლემებს უქმნიდა.
შემოსავლების სამსახურში აცხადებენ, რომ ახალი პროცედურით საკმარისია სულ რამდენიმე ძირითადი პრინციპის დაცვა:
1: მეწარმეს უნდა გააჩნდეს საწვავის შეძენის კანონმდებლობით დადგენილი დოკუმენტაცია;
2: საწვავი უნდა იქნას გაწერილი საწარმო საკუთრებაში ან სარგებლობაში არსებულ ძირითად საშუალებებზე (როგორც ავტოსატრანსპორტო, ასევე სპეცტექნიკა)
3: მეწარმემ უნდა აღრიცხოს, თუ რომელ ავტოსატრანსპორტო საშუალებაზე რომელი ტიპის და რა ოდენობის საწვავი გასცა.
საწვავის ხარჯებში ჩამოწერისათვის საკმარისია მეწარმემ თვეში ერთხელ მოახდინოს ოდომეტრის ჩვენების დაფიქსირება. აღარ არის სავალდებულო საწვავის ხარჯვის აღრიცხვის დამადასტურებელი სხვა დოკუმენტების წარმოება.
ავტოსატრნსპორტო საშუალების ტექნიკური მახასიათებლებისა და ოდომეტრის ჩვენების მიხედვით იანგარიშება გახარჯული საწვავის ოდენობა 20%-იანი დასაშვები ცდომილებით. ასევე გათვალისწინებულია ავტოსატრანსპორტო საშუალების სიძველე.5 წელზე უფრო ადრე გამოშვებული ტექნიკისათვის დასაშვები ცდმომილებაა 25%.
შემოსავლების სამსახურის განმარტებით, თუ სატრანსპორტო საშუალება ან სპეცტექნიკა, ზემოთ მითითებულ დასაშვებ ნორმებზე მეტ საწვავს მოიხმარს, მაშინ მეწარმემ უნდა აღრიცხოს ფაქტობრივი ხარჯი და შესაბამისი საექსპერტო დასკვნის საფუძველზე მოხდება ამ ხარჯის გათვალისწინება და ჩამოწერა.