ლონდონისა და ნიუ-იორკის სამშენებლო კომპანიები ცათამბჯენების აშენებაზე უარს აცხადებენ. ამის შესახებ Bloomberg-ი იტყობინება.
ბრიტანეთის დედაქალაქის წამყვანი დეველოპერები მაღალ შენობებს, მოგების სასარგებლოდ, მსხვერპლად სწირავენ. ნიუ-იორკი, რომელიც მომავალი წლისთვის მსოფლო სავაჭრო ცენტრის ცათამბჯენის გახსნისთვის ემზადება, დეკადის ბოლომდე მხოლოდ რამდენიმე მაღალ შენობას ააშენებს.
"საკულტო ცათამბჯენთა შენების მანიამ უკვე გადაიარა",_ამტკიცებს ბრიტანელი არქიტექტორი კენ შატლვორფი. მისი თქმით, საჩვენებელი ბრწყინვალების ერა დასრულდა. ამასთან, მშენებელი კომპანიებისთვის უფრო მომგებიანია თანხები დაბალსართულიან შენობებში ჩადონ.
"დეველოპერებმა შედარებით იაფი და ნაკლებ ამბიციური პროექტების განხორციელება დაიწყეს",_აღნიშნავს Bloomberg-ი.
ერთი კვადრატული მეტრი ცათამბჯენის მშენებლობის ღირებულება ლონდონში 150 ევროთი მეტია, ვიდრე ჩვეულებრივი სიმაღლის შენობის. ექსპერტთა თქმით, ეს განსხვავება დამატებითი ხარჯებითაა განპირობებული, რაც სიმაღლის მისაღწევადაა აუცილებელი. კერძოდ, ცათამბჯენის აშენება განსაკუთრებულ საინჟინრო გადაწყვეტას მოითხოვს, რაც ძლიერი და ძვირადღირებული კარკასის აგებასაც გულისხმობს.
ამის გამო, კომპანიებს 500 ათასი კვადრატული მეტრის ცათამბჯენის აშენება ამავე ფართის ჩვეულებრივი სიმაღლის სახლთან შედარებით, 150 მილიონით მეტი უჯდება.
ანალიტიკოსებმა ცათამბჯენებზე უარის თქმის გადაწყვეტილება პატივმოყვარეობიდან საღ გადაწყვეტილებამდე გადადგმულ ნაბიჯად უკვე შეაფასეს.