აზერბაიჯანის ტურიზმის ასოციაციის ხელმძღვანელმა ბახიდ ბაგიროვმა განაცხადა, რომ იმ უცხოელ ტურისტებს, რომელთაც სურვილი ჰქონდათ, აზერბაიჯანში ჩასულიყვნენ, სავიზო რეჟიმი სერიოზულ პრობლემას უქმნიდა.
პრობლემა იქმნებოდა იმითაც, რომ აზერბაიჯანის ვიზების მიღება შესაძლებელი იყო მხოლოდ იმ ქვეყნებში, სადაც ქვეყნის საელჩოებია განთავსებული.
"უცხოელების მხრიდან გამოითქვა არაერთი უკმაყოფილება, მათ სურდათ აზერბაიჯანში ტურისტის რანგში ჩამოსვლა და ვიზების გაფორმებასთან დაკავშირებით სერიოზულ პრობლემებს აწყდებოდნენ", - განაცხადა ბაგიროვმა.
მან აღნიშნა, რომ სავიზო რეჟიმის გამარტივება, ქვეყნის ტურისტული ინდუსტრიის განვითარებას, სერიზულად შეუწყობს ხელს. მისი თქმით, ვიზების გაფორმებით დაკავებული იქნებიან ტურისტული კომპანიები, რაც, ბაგიროვის აზრით, იქნება სერიოზული ბიძგი შიდა ტურიზმის განვითარებისთვის.
შეგახსენებთ, რომ აზერბაიჯანის პარლამენტმა მიიღო შესწორებები კანონში, რომელიც ტუროპერატორებს ვიზების გაცემის უფლებას აძლევს.
