ბრიტანულმა სამოგზაურო ბიურომ Historical Trips კლიენტებს ადოლფ ჰიტლერის ნაკვალევზე ექსკურსია შესთავაზა. სამოგზაურო ტური, სახელწოდებით "ბოროტების სახე", 11-იდან 19 ივნისამდე გასტანს. ერთი ტურისტისთვის მისი ღირებულება 2400 ევროს შეადგენს.

ტური მიუნხენის ლუდხანა "ბურგერბროიკელერიდან" იწყება. ეს ის ადგილია, სადაც 1939 წელს ფიურერზე წარუმატებელი თავდასხმა მოხდა. ტურისტებს ვახშამი კიდევ ერთ ლუდხანაში ელით, სადაც 1920 წელს გერმანიის ნაციონალ-სოციალისტური მუშათა პარტია დაარსდა.

ტურისტულ ობიექტთა შორის არის დახაუს საკონცენტრაციო ბანაკის ადგილზე აღმართული მემორიალი, ასევე, ობერზალცბერგი, სადაც მოკავშირეთა მოიერიშეების თავდასხმამდე, 1945 წლამდე, ჰილერის მთიანი რეზიდენცია_ბერგჰოფი იყო განთავსებული.

ექსკურსიის ფინალი ბერლინში მდებარე მარლირის ვილა იქნება, სადაც 1942 წელს გამართულ კონფერენციაზე ევროპის ებრაელთა განადგურების გეგმა მიიღეს. საბოლოოდ ტურისტები ადოლფ ჰიტლერის ბუნკერში გადაინაცვლებენ, სადაც 1945 წლის აპრილში ფიურერმა თავი მოიკლა.

ტურისტული ბიუროს Historical Trips-ის დიდ ბრიტანეთში გამოჩენამ კრიტიკის ტალღა გამოიწვია. ნაციზმის საკითხებში ცნობილი ისტორიკოსი დევიდ ციზარინი აცხადებს, რომ ამგვარი მარშრუტები საბოლოოდ "გარყვნილ მომლოცველობად" გადაიქცევა. სხვები კი მიიჩნევენ, რომ ექსკურსია, სახელწოდებით "ბოროტების სახე", უფრო სენსაციაზეა გათვლილი, ვიდრე ისტორიულ მოვლენათა რეალურ ახსნაზე.