"თიბისი ბანკი" ბანკი "კონსტანტას" აქციათა საკონტროლო პაკეტის - 80%-ის მფლობელი გახდა. „ბანკი კონსტანტა ერთ-ერთი საუკეთესო ბანკია მიკროსაფინანსო ბაზარზე, რამაც განაპირობა ჩვენი დაინტერესება ამ საფინანსო ინსტიტუტით. მას საკმაოდ გამართული და კარგი მენეჯმენტი აქვს, რომელსაც სრულ ნდობას ვუცხადებთ. შესაბამისად, უახლოეს მომავალში არ ვგეგმავთ კონსტანტას მენეჯმენტთან და არსებულ სტრატეგიასთან მიმართებაში რაიმე მნიშვნელოვან ცვლილებას. კონსტანტა გააგრძელებს საქმიანობას, როგორც დამოუკიდებელი საბანკო ინსტიტუტი, ხოლო თიბისი ბანკი, თავისი რესურსებითა და გამოცდილებით, მხარდაჭერას გაუწევს მას, რათა კონსტანტამ კიდევ უფრო სწრაფად განავითაროს თავისი საქმიანობა", - განაცხადა თიბისი ბანკის გენერალურმა დირექტორმა ვახტანგ ბუცხრიკიძემ.
თიბისი ბანკი გეგმავს, თავისი წარმატებული გამოცდილება ეფექტურად ასახოს კონსტანტას საქმიანობაში, რათა იგი კიდევ უფრო გააქტიურდეს არა მარტო საკრედიტო, არამედ დეპოზიტების ბაზარზედაც, სადაც კონსტანტა შედარებით ახალი მოთამაშეა - დანერგოს ახალი პროდუქტები და წარმატებით განახორციელოს ყველა ის ამოცანა, რომელიც მისი სრულყოფილ საბანკო ინსტიტუტად ჩამოყალიბების სტრატეგიული გეგმის ნაწილია.
"ნებისმიერი ბანკისთვის სტრატეგიული პარტნიორის ძიება მუდმივი პროცესია. მიუხედავად იმისა, რომ არსებობდა შემოთავაზებები ადგილობრივი და უცხოური ფინანსური ინსტიტუტებიდან, არჩევანი ქართულ ფინანსურ ინსტიტუტზე გავაკეთეთ. "თიბისი ბანკის სახით ბანკმა კონსტანტამ ძალიან მყარი და ძლიერი პარტნიორი შეიძინა, რომელიც გაამყარებს ჩვენს პოზიციებს ქართულ მიკროსაფინანსო ბაზარზე და ხელს შეუწყობს ბანკის სწრაფ ზრდას. ბანკი კონსტანტა გააგრძელებს საქმიანობას მიკროსაფინანსო სექტორში უფრო გაზრდილი და ამბიციური გეგმებით", - აცხადებს ბანკი კონსტანტას გენერალური დირექტორი ლევან ლებანიძე
ქართულ საბანკო სივრცეში ეს იქნება ორი საბანკო ინსტიტუტის ამ ტიპის თანამშრომლობის პირველი პრეცედენტი, როდესაც ხდება არა ერთი ბანკის მიერ მეორის შერწყმა საკუთარ ინფრასტრუქტურაში, არამედ ორივე მათგანი დამოუკიდებელ სუბიექტებად აგრძელებენ ბაზარზე ფუნქციონირებას.
ბანკი კონსტანტა 2010 წლის განმავლობაში ერთ-ერთი ყველაზე წარმატებული და სწრაფად მზარდი ფინანსური ინსტიტუტი იყო და დღესაც განაგრძობს წინსვლას. გარიგების ფარგლებში, ბანკი კონსტანტას პირველი უცხოელი აქციონერის, საერთაშორისო საფინანსო ორგანიზაცია OikoCredit-ის წილი შენარჩუნდა და კვლავ 13%-ს შეადგენს, ხოლო დარჩენილი 7%-ის მფობელებად რჩებიან ქართველი ფიზიკური პირები.
