აშშ-ში ფინანსთა მინისტრის კახა ბაინდურაშვილის 6-დღიანი სამუშაო ვიზიტი დასრულდა. ვიზიტის ფარგლებში ფინანსთა მინისტრმა მონაწილეობა მიიღო მსოფლიო ბანკისა და საერთაშორისო სავალუტო ფონდის ყოველწლიურ საგაზაფხულო შეხვედრაში. მინისტრმა შეხვედრები გამართა საერთაშორისო სავალუტო ფონდის აღმასრულებელ დირექტორთან, საერთაშორისო საფინანსო კორპორაციის ვიცე-პრეზიდენტთან, ასევე სარეიტინგო კომპანია STANDARD&POOR'S-ის წარმომადგენლებთან.
ვიზიტის ფარგლებში კახა ბაინდურაშვილი იმ სტუდენტებსაც შეხვდა, რომლებიც ამერიკის შეერთებული შტატების სხვადასხვა წამყვან უნივერსიტეტებში სწავლობენ. მინისტრმა მათთვის საჯარო ლექცია წაიკითხა და გააცნო ქვეყნის ეკონომიკური ვითარება, როგორ ვითარდება საქართველოს ურთიერთობა საერთაშორისო ბაზრებზე, როგორ ართმევს თავს ქვეყანა სირთულეებს და სხვა. „შეხვედრას სხვადასხვა სპეციალობის მაგისტრანტები და ბაკალავრები ესწრებოდნენ. ვუპასუხე მათთის საინტერესო შეკითხვებს. ბევრი მათგანი საქართველოში დიდი ხანია არ ყოფილა და ბუნებრივია, აინტერესებდათ, რა შეიცვალა ჩვენს ქვეყანაში, როგორ მიმდინარეობს რეფორმები, რა გამოწვევების წინაშე ვდგავართ," - განაცხადა ფინანსთა მინისტრმა.
კახა ბაინდურაშვილი ამერიკის შეერთებულ შტატებში მიმდინარე თვის დასაწყისშიც იმყოფებოდა, სადაც სან-ფრანცისკოსა და ლოს-ანჯელესში გამართულ სპეციალურ შეხვედრაზე ინვესტორებს საქართველოს საინვესტიციო გარემო და ქვეყანაში მიმდინარე რეფორმები გააცნო.